京都米芝蓮一星餐廳富小路やま岸舊年進駐香港，今年再開副線。新店主打日本現代燒肉，選用東京過百年歷史供應商「日山畜產」嘅和牛。供應多款套餐，其中以店名為題嘅套餐更特別設計咗一款海膽和牛手卷，以富小路やま岸嘅招牌海膽手卷演化而成㗎！
 

焼肉而今店名嚟自富小路やま岸山岸大將嘅座右銘「活在當下（而今）」，店內約90%嘅和牛都由「日山畜產」空運到港，皆因佢哋嘅牛肉有可追溯性，而且品質穩定。團隊更特別研究出和牛黃金比例5:5，即油脂較多嘅霜降同紅肉較多嘅赤身各占一半。
 

餐廳裝修以大地色調為主調，糅合大自然元素及簡約風格。有唔少卡位供2至6人入座。餐廳供應多款午市套餐及晚市套餐，其中最有代表性嘅就係晚市嘅而今Jikon Set（$1280/位），唔單止會由Beef Master代為燒肉，仲有齊餐廳嘅招牌菜式！
 

泡菜

以自家製泡菜作為前菜，味道同大家平時食開嘅韓式泡菜相約，但調味較淡，可以食到更多食材原味，口感亦更爽脆。
 

煙燻和牛配魚子醬

創新菜式之一，用A5黑毛和牛肉先低溫慢煮兩個鐘，上枱前再炙燒表面，最後喺席前用櫻花木煙燻。食落唔單止有煙燻嘅香氣同和牛嘅肉香，仲有魚子醬嘅鮮味。
 

和牛他他配和牛壽司

和牛壽司會以松露或蒜片醬點綴以帶起肉香，記得食埋碟邊嘅清酒蕃茄解膩。而享用緊和牛壽司嘅時候，Beef Master就會製作和牛他他，先將麵包片烤熱，再將生雞蛋同和牛他他混合再放到麵包上，食起嚟口感特別滑溜。
 

而今特選鹽燒和牛3切

特選牛肉部位會按時令更改，三款都只用鹽調味，所以可以品嘗到和牛最原本嘅肉香同脂香。當然按情況亦可以自己選擇加醬汁或者檸檬汁調味，例如拍攝當日嘅其中一款燒肉為薄牛舌，Beef Master就特別準備咗鹽昆布，增加醇香。
 

而今特選醬燒和牛1切配海膽和牛熱狗

拍攝當日嘅醬燒和牛係後腿肉，油脂較少肉質軟嫩，配搭醬汁可以增加風味。而海膽和牛熱狗就用咗臀肉，油脂較少而分佈均勻。Beef Master燒好後以紫菜同紫蘇葉包起，最後再加上海膽。半融嘅海膽味道鮮甜，同和牛嘅濃郁肉香夾埋係互相加分嘅配搭！最後會有一絲紫蘇葉嘅清香平衡膩感。
 

沙律

夏多補里昂1切及和牛西冷配柚子醋

夏多補里昂即係菲力最中心嘅部位，係和牛稀有部位之一，油脂唔多但口感非常軟嫩，Beef Master以細火慢烤鎖住肉汁，食起嚟滿嘴肉香。而和牛西冷霜降分佈均勻帶少少筋，燒過後更有咬口，配上蘿蔔蓉及柚子醋就可以解膩。
 

吸物

即係清湯，係畀大家喺試下一道菜之前清新一下味蕾。上枱前會特別喺碗上噴上水霧，係證明呢份吸物專客人而製作，之前無其他人開過蓋，以示尊貴。
 

而今特選壽喜燒配松露

最後一份燒肉係壽喜燒形式，以當日嘅特選稀少部位燒肉，配搭壽喜燒醬汁、生雞蛋同越光米飯，最後加上即刨法國黑松露點綴，多重香氣爆發！
 

冷麵或和牛湯麵或和牛茶漬飯

建議大家可選冷麵，因為係由富小路やま岸主廚監督嘅同款冷麵！麵條幼細，口感爽滑清涼，加上鮮味淡雅嘅高湯，感覺清新。
 

而今甜品

焼肉而今 by 富小路やま岸  
地址：尖沙咀梳士巴利道18號Victoria Dockside K11 Musea6樓603號舖

文：Cathy
相、片：Tom Li