喺艱難嘅日子，總係會見到人性嘅光輝。隨住每日確診嘅數字愈嚟愈多，防疫措施愈收愈緊，好多行業都受影響，令到好多朋友都面臨失業或被cut鐘嘅情況。觀塘有間小社企餐廳，規模唔係話好大，但佢哋嘅愛心就好大，6年嚟一直堅持派飯畀有需要嘅朋友，即使而家冇得開晚巿，都冇停過派飯嘅服務，更月派15000份食物！
圖：嗎哪餐廳喺Facebook宣佈由即日起至本月24號，冇晚巿堂食期間，餐廳會照常開放，不過就只係用嚟派免費飯畀失業嘅朋友。只要係受疫情影響嘅行業，好似旅遊、美容、健身等，都可以喺6點後去領取免費飯。餐廳負責人表示因為自己都曾經試過失業，「失業最怕嘅係唔知幾時先失完」，「疫情下有錢嘅持續有錢，窮嘅就一再無底線窮落去……失去盼望，唔知聽日點。有人陪住，有人幫手分擔到開支，可能個心會定啲」，所以就決定寧願暫停正常飯餐供應都要繼續派飯。
即使遇著長者嘅居住大廈要強檢，亦無阻愛心嘅派送。餐廳分享佢哋會照舊每日送飯，不過就將飯盒放喺約定嘅地方，離遠見到長者拎咗飯盒先離開，此舉既確保長者每日有新鮮飯食，亦可保護員工健康。
圖：呢間社企餐廳一向被客人稱讚環境舒服，CP值高。平日主力供應中式蒸飯、西餐快餐同意粉等，另外亦有café系嘅全日早餐等，推介雞扒蜜糖芝士吐司，大大份夠飽肚，雞肉嫩滑香口。
嗎哪餐廳
地址: 觀塘翠屏道11號觀潮浸信會1樓