成日都講下一站天后，但你有幾可下一站真係天后？呢區最近開咗一間新餐廳，係香港比較少食到嘅新疆菜，仲要係由新疆人開嘅新疆菜餐廳，夠晒正宗。

一講起新疆，通常大家嘅印象都係羊肉，咁就先介紹呢度嘅烤羊肉串。呢串羊串，未食落口，就咁睇賣相已經贏咗道霸氣先，用鐵籤拮住幾粒羊肉，長到呢~ 燒烤味好香，羊肉腍身，羊羶味唔算好重，加上用咗唔少孜然粉去整，就更加香口。呢個時候，飲返杯凍冰冰嘅啤酒就perfect池了。

另一道都係以羊肉做食材嘅菜式，係饢包肉。呢道都係新疆常見嘅菜式。六塊饢包半浸住湯汁，中間舖滿羊肉，仲有啲紅椒青椒呀咁，成碟嘢嘅顏色都襯得幾靚。上菜之後盡快食喇要，趁塊饢包未完全畀啲汁浸到淋晒嘅時候，熱熱地，又軟軟地，混雜住羊肉汁嘅香味，仲可以食到本身嘅酥脆口感。而浸耐少少先食呢，又係另一種感覺，軟得嚟依然有韌度，夾埋羊肉食嘅羊味就更加濃郁。

餸如其名，大盤雞，就真係好大盤雞。不過又唔淨係得雞嘅，薯仔亦係另一個主角，夾到落底仲有手工拌麵，成碟嘅份量多到4個人都未必食得晒。食得辣嘅朋友記得加辣，辣辣地香啲之餘亦更加入味。雞肉嫩滑，薯仔同麵條又索晒啲汁。必須要講一講啲麵，手工拌麵嚟，全部都係老闆娘人手打㗎，每一條都長長der闊闊der，好有咬感，食得出係心機菜呀。

餐廳以前喺北角開過店，搬咗嚟之後，主力做新疆菜，亦有兼做川菜同廣東菜。

天山小館
地址：天后水星街12號海新大廈地下A鋪

文、相：Kar