唔少香港人閒時都鍾意飲下sake，不過開一支都唔平呀，更莫論話想一次過試多幾款唔同口味。不過去大角咀呢間日式料理就有機會喇！餐廳由日本師傅主理，最近新推出2小時日本酒同關東煮放題，要暢飲近40款日本酒不是夢。

呢間居酒屋以關東煮作為主打，湯底堅持以鯛魚骨、柴魚同昆布熬製，味道濃郁甘甜。新推出嘅日本酒+關東煮放題套餐，包有前菜、關東煮、日式烏冬同多款清酒。

前菜方面推介炸池魚仔，甘香酥脆，佐酒一流。

關東煮則有10款指定款式選擇，其中特別推介半片（日本白魚餅）、麻吉燒、韓式魚糕串同埋食親關東煮都一定要食嘅大根。半片喺香港比較少見，係由豆腐製成嘅魚餅，口感嫩滑得嚟又有淡淡豆腐嘅清香，值得一試再試。麻吉燒則喺魚餅中釀入麻糬，增加Q彈口感。

烏冬方面有3個選擇，明太子冷烏冬、北海道風雞皮烏冬同日式牛肉稻庭烏冬，其中以北海道風雞皮烏冬比較少見同特別，雞皮油香豐富，一嚟送酒好夾，二嚟原來雞皮嘅油脂重有保護胃部嘅作用，打咗底冇咁易醉。

至於重點中嘅重點，清酒放題，就有2個套餐揀。平少少嘅「竹」有近廿款生啤同清酒揀，加多少少錢揀「松」嘅話，就可以多埋果物酒等選擇，酒款多近1倍呢。

特別推介鶴梅完熟梅濁酒，係加入咗成熟桃子醬同完熟嘅南高梅釀造，帶有濃郁桃香同梅香，而且甜度比平時嘅梅酒低。

另外值得推介嘅重有宗政 純米吟釀同出羽櫻 櫻花吟釀，前者使用高酯生成酵母，口味甘甜，酸味平衡；後者帶蜜瓜果香，口感輕盈，建議可冷至室溫飲用。

関東酒場  
地址: 大角咀利得街11號利奧坊地下G504號舖

文、相、片：Kar