自問胃口大，食量多嘅朋友仔，最啱就梗係食放題啦，任食先夠飽嘛。大圍有間餐廳，乜嘢都有得放題任食呀：雞煲又有、串燒又有、打邊爐都有，成晚無限時任食，重有5款靚牛任點，好易翻本！

呢度嘅雞煲，係即叫即炒，加入以花椒、白蔻、乾辣椒等自家炒成嘅麻辣醬料，雞肉比一般雞煲食開嘅嫩滑啲、入味啲，惹味得嚟又唔會太辣。

食完雞煲之後，就可以揀湯底，開始打邊邊咯。湯底選擇包括花膠雞濃湯、四川麻辣湯、超特濃沙嗲牛湯等，款款真材實料，花膠雞湯加入枸杞、蟲草花、紅棗等熬製，煲煲仲有3大片花膠夾上手食呢！

牛魔王當然唔可以錯過任食5款靚牛嘅機會！安格斯肩胛牛肉嘅肉同脂肪分佈平均，油花既多且香。

安格斯黑牛板腱油花分佈均勻，肉味仲好香添。

美國牛頸脊嘅肉質相對柔嫩爽滑， 仲有豐腴嘅肉汁。

安格斯牛小排則係肉味最濃郁嘅一款。

至於美國 SPF黑毛和牛同樣高質，口感嫩滑，又有香濃嘅肉味。食得辣嘅朋友仔，建議配四川麻辣湯底，辣度唔太高但會令肉味變得更甜呢。

另外，仲有超過30款嘅海鮮、串燒同多款配料選擇。好似廣島蠔、原隻扇貝、香草羊架、燒多春魚、雞肉豬肉等，啤酒汽水都係任飲！而家經OpenRice訂座嘅話，最平$178就食到晒咁多嘢！

金凱小廚

地址: 大圍美田路30號美林邨熟食亭1-4號舖