邪惡韓式芝士炒飯 Sister Korea Cafe
Photos by 肥阿脾 & 糖小妹
如果有Friend鐘意食韓國菜嘅話，可以兜過嚟呢邊食餐餐先。雖然藏身喺屋村商場裡面，但憑住超邪惡嘅部隊芝士拉麵蛋邊鍋同漢拿山芝士蛋熔岩豚肉炒飯依然吸引到唔少人專登嚟試。前者聽個名就知大堆頭，成班人一齊開心Share就啱；後者會有韓國侍應幫手炒，泡菜、芝士再加蛋無得輸。
自暴自棄級芝士撈丁 康和車仔麵茶餐廳
Photos by 叮叮w & happy_lego23
踩車前想食啲邪惡美食，仲有呢間車仔麵檔可以揀，因為佢地嘅豬頸肉芝士撈公仔麵簡直就係自暴自棄等級！大大塊燶邊燒豬頸肉衾住下面嘅帶少少甜嘅芝士汁同丁麵，調味得宜所以唔會膩到食唔哂。需要Keep Fit嘅亦可以嗌返車仔麵，超過五十種餸自由搭配，Light啲嘅可以揀清甜夠腍嘅蘿蔔，重口味啲可以揀香辣煙韌嘅麻辣豬肚。
招牌鹽焗雞飯炒底 漢年茶餐廳
Photos by ~Snoopy~
如果你係無飯不歡或者特別鐘意食雞嘅話，呢間茶餐廳一定啱你！佢地嘅金牌鹽焗雞肉夠嫩又有雞味，雖然就咁聽呢句「雞有雞味」好似廢話，但係而家啲雞肉...你懂的。而且識食一定轉炒底，炒飯即叫即炒，粒粒分明，加上雞蛋同雞汁（鹽焗雞肉嘅雞汁，唔係乜姐煮咩都加嗰隻），滿足哂。
街坊食堂嘆肉餅 金城茶餐廳
Photos by cecicheung
唔鐘意食雞嘅，仲有另一款碟頭飯推介：生煎肉餅飯！厚身肉餅大塊到可以遮住碟飯，外面香脆而裡面嘅肉啱啱好熟，加埋豉油撈飯食一流。另外仲有椒鹽豬扒飯，豬扒分量一樣非常多，煎至香口再加惹味椒鹽一樣啱送飯。如果你係真·重口味人士嘅話，再加自家制嘅辣菜脯，加多一份香辣同滿足。
平靚正街坊腸粉舖 坤記腸粉
Photos by yingyingeateat
此坤不同彼坤，呢度唔會有坤哥同你唱「原來他不夠愛我」，但有唔少街坊由細食到大嘅腸粉同各式小食。熱焫焫腸粉夠滑溜咬落有米香，而且必讃嘅係店員落醬完全唔孤寒，鐘意「混醬」嘅實開心。另外咖喱魚蛋、炒粉麵、牛肉球同粉果都有水準。唯獨要留意嘅係呢度嘅蘿蔔糕係蒸唔係煎嘅，而且蘿蔔分量唔多，胃口唔大嘅可以唔洗浪費Quota試。
文青Feel台日Cafe 屋子咖啡
Photos by R.A.W & 龍格保
入到大圍想搵間Cafe Relax一下嘅話，相信唔少人都會第一時間諗起呢間咖啡店，台味十足嘅裝修同精緻嘅台日Fusion料理都非常有悠閒嘅感覺。主菜選擇唔多，主要係定食或者蓋飯。重點嘅甜品推介燕麥榛子梳乎里同小倉抹茶窩夫，前者喺輕盈鬆化嘅梳乎里當中加咗有咬口嘅燕麥，稍嫌榛子味唔夠出；後者抹茶雪糕帶回甘，配細細隻嘅圓形窩夫非常夾。
洗版Homemade紫薯包 Dear Coffee & Bakery
Photos by ivy_cky
早前喺Instagram同Facebook嘅紫薯包就係嚟自大圍呢間Cafe，鐘意食麵包又想Hea下嘅嚟呢度就啱啦。呢度嘅麵包全部都係自家制，所以可以100%控制材料成分。100%紫薯包麵包鬆軟，上面嘅無添加紫薯蓉清甜怡人，雖然價錢較高但食得出誠意滿分。連我地開飯專欄作家小不啦嘰1大口都讃呢度有「微小而溫馨的寧靜」呢。
高CP值刺身壽司 甘豐寿司
Photos by mandymanlovefoodie & 天野海月
香港人鐘意食日本菜是常識吧，想食靚海鮮但又想錫住荷包，喺大圍可以去呢間壽司店，佢地用嘅海鮮都係產地直送，保證新鮮。不過要注意嘅係舖頭只有四個座位，建議外賣去附近朋友屋企食。而且有選擇恐懼症嘅朋友仲可以點廚師發辦，講低人數同Budget請師傅幫你諗食乜，踩完車嚟個滋味Party就Good fit！
隨時接收最新資訊
讚好OpenRice專頁！
