等咗咁耐，大圍站上蓋全新商場「圍方」於7月22號正式同大家見面啦！商場總樓面面積大約65萬平方呎，將會有4層商舖樓層，匯聚近150個商戶，集食、玩、買於一身～作為搵食先鋒最關注當然係食啦，開飯仔一於率先帶大家睇睇有咩人氣餐飲進駐，無論你鍾意食咩都有得你揀！
目錄
純白風咖啡店 NOC Coffee Co.
啱晒打卡去嘅咖啡店，走純白風格，新店更有大型落地玻璃窗，採光度高。主打以自家烘焙咖啡豆嘅精品咖啡、手沖咖啡、拉花咖啡及各款精緻輕食～新店限定嘅椰子斑蘭咖啡以椰青水為基底，配搭濃縮咖啡、斑蘭汁，再加上一層奶泡，漸層夠IG-able之餘、味道亦好清爽。甜品方面要試下蛋撻，外層酥脆餡料有蛋香唔太甜。
野田珈琲生豆專門店 X 美髮店 Under the Roof
佔地4,000呎嘅日系咖啡店，以日本傳統建築為藍圖，用上屋樑、木柱、水泥、枯山水同海浪特色牆區間，文青必去！咖啡店分三個部分，「野田珈琲生豆專門店+焙煎」內專設新鮮焙煎房，客人可觀看咖啡生豆、焙煎同沖煮過程，仲有Cupping Laboratory杯測房體驗咖啡沖煮活動～「野甜屋」洋食甜品部就供應一系列日系風格創意甜品，而「LOBBY by Hair Corner」之內則設有輕造型區域，30分鐘就可以轉下造型！
知名海南雞飯專門店 Chatterbox Café
來自新加坡嘅知名海南雞飯專門店，第二間香港分店就進駐大圍呢個新商場。招牌文華海南雞飯肉質鮮嫩滑溜，飯由雞湯同雞油烹煮而成，香濃但不油膩。圍方店更會率先帶嚟香港首次登場嘅夏日海鮮推介海陸Home，包括星洲脆香麥皮海蝦及新加坡亞參金目鱸魚，味道夠晒正宗！
正宗淮揚菜館 御‧家上海
帶屋企人行新商場想搵地方食飯，呢間淮揚菜館就啱啦。圍方新店繼續由祖籍揚州的行政總廚欒華宏師傅主理，除咗鐵板灌湯生煎包、蜜汁脆鱔及鮑魚紅燒肉等招牌菜式外，仲有新店限定菜式，包括八寶肉餅蒸膏蟹，蟹嘅鮮味入晒落肉餅度，好juicy；酒糟蒸西湖白魚嫩滑帶淡淡酒香，仲有香蔥金錢肚拌香乾、茘枝蝦球、家上海冬蓉燒餅等。
熱帶休閒風創意泰菜 米泰 Khao San
圖: DollyLing
好有異國情調嘅泰國菜館，主打新派嘅傳統泰國菜～推介有炭火串燒，以明火烤製，燒出嚟嘅串燒特別香口，外焦內嫩，加埋香濃嘅沙嗲醬，花生嘅香氣令層次更豐富。啖啖蟹肉咖喱配薄餅真係啖啖都係鮮味蟹肉，薄餅脆而不油，點咖喱食真係一流。
手搖海鮮袋 The Captain’s House
圖: 美式海鮮餐廳，最招牌一定係shake shake手搖海鮮袋，可以自己選擇Size、海鮮種類同醬汁，靈活度好高。海鮮樣樣新鮮，如海蝦爽口彈牙，蜆肉同扇貝都非常鮮甜，想食豪啲仲有松葉蟹腳同波士頓龍蝦揀㗎～醬汁推介卡薑蒜蓉汁，辣辣地好惹味但又唔會蓋過海鮮鮮味。
多元化日式居酒屋 鳥十
圖: Foodie_Ooli
滿滿日式風味嘅居酒屋，供應一系列日式料理如壽喜燒、丼飯、串燒、壽司及拉麵等。推薦龍蝦雜錦刺身丼，刺身好新鮮同種類好多，最重點嘅龍蝦真係好鮮甜；鳥十魷魚卷都值得一試，新鮮脆口鹹香嘅魷魚包住鮮甜海膽，味道同口感對比都好大但意外地配合！
柔和綠調品牌cafe agnès b. Café
以柔和綠調作主打、走清新風嘅品牌咖啡店～主打一系列咖啡店美食，配以烘焙咖啡、Mariage Frères茗茶，而家咁啱舉行緊咖啡節，供應4款限定嘅冷萃咖啡，如椰子冷萃咖啡，以清甜滋潤嘅椰子水萃取，啖啖清甜。仲有多款咖啡系列法式蛋糕，如咖啡雙重朱古力撻、咖啡閃電泡芙及特濃咖啡牛角包窩夫伴香草雪糕，款款咖啡味都好濃郁。
招牌最上等牛肋骨 Galbi Gung
鍾意韓國燒烤嘅朋友啱晒啦！呢度供應嘅肉類都好高質素，如招牌菜最上等牛肋骨，肉嫩甘香，牛味香濃。甕漬牛肋骨以以韓國秘製醬汁醃製，香甜惹味。另外當然唔少得多種韓國料理， 如 1++韓牛生牛肉石鍋飯、燉和牛牛舌豆腐鍋及濟州鮑魚人蔘雞湯，味道都好正宗。
英倫風酒吧餐館 BRICK LANE
餐廳主打糅合現代元素嘅傳統英式美食，圍方新店佔地約2,000平方呎，裝修就以東倫敦Stratford風情為主調，舒適而富有活力。供應最出名嘅多款英式全日早餐之外，亦有新口味嘅班尼迪蛋、牛角包窩夫、羅馬披薩，同一系列經典酒吧美食，例如英式炸魚薯條、酥皮黑啤燉牛肉等選擇。
人氣台式火鍋+茶憩店 湊湊火鍋‧茶憩
呢間人氣台式火鍋、茶憩店將於8月28日開幕！圍方店嘅裝修以「時光島嶼」為題，融入大圍嘅人文情懷同自然景色，例如選用水紋玻璃以及多款園林造景，設計獨特。餐廳主打嘅台式麻辣火鍋「勵志鍋」，以雞骨、牛骨細火慢燉6小時製作高湯，再加入各種中草藥材濃縮熬煮2小時，集「麻辣醇辛甘香」六種風味；邊嘆火鍋邊飲選用大紅袍、龍井等知名名貴原葉茶做茶湯嘅台式飲品，解辣又滋味。嚟緊新張期間，下午2時起入座並於6時前離座，即享鍋底、茶飲85折優惠；而夜貓時段晚上9時後入座，則有8折。
日本過江龍砂鍋烏冬店 山本屋
擁有近百年歷史、喺名古屋開業嘅人氣砂鍋烏冬店登港喇！圍方係品牌首間海外分店，由第五代傳人之一嘅青木晃佑坐鎮。烏冬以精選日本產小麥粉同過濾水，配合傳統手打技法每日新鮮製造，每條生烏冬生跟足尺寸為四毫米粗，再放入餐廳獨創嘅伊賀燒砂鍋燉煮，口感彈牙。湯底方面提供味噌、咖喱同清湯口味，其中親子煮烏冬、吉列豬扒煮烏冬都值得一試。
另外收到消息仲會有更多人氣餐廳進駐，想知道最新消息就記得緊貼住我哋啦！
文: Yanica、Cathy.C
片: Cathy.H
