多啦A夢粉絲要把握時間過銅鑼灣一轉啦~ 事關全新「多啦A夢郵局」期間限定店今日開始登陸咗時代廣場中庭喇，除咗有好多獨家限定嘅精品之外，仲有多款特別版嘅軟雪糕同大判燒！不過只係去到今個月尾咋……雖然你哋本命係多啦A夢，但佢都借唔到隨意門同時光機畀你哋㗎。

平時以抹茶甜品為主嘅Sweets House Cha Cha，今次特地為多啦A夢創作咗幾款限定甜品。軟雪糕有兩種味，一係就粉藍色嘅波子汽水，一係就藍白色嘅波子汽水配牛奶味，兩種味道都唔算好甜。

PS. 全線分店都有得賣㗎，其中海港城、新城巿廣場同又一城分店仲會賣到3月11號添

多啦A夢最愛嘅豆沙包就冇喇，不過就有10款大判燒。有鹹有甜，分別係紅豆、吉士、蕃薯、抹茶紅豆、抹茶吉士、抹茶紅豆吉士、千島醬香腸、章魚燒同芝士漢堡牛肉味！有選擇困難？建議可以試下鹹嗰幾款呀，大判燒外層軟熟，章魚燒真係有粒粒章魚㗎，有咬口，燒汁都係調配過嘅，好香口。

至於「郵局」內，就有好多款限定精品，好似道具午餐盒、碟、杯呀咁，以後就有多啦A夢陪住食飯啦~ 溫馨提示買咗嘢記得拎單喎，因為憑單去食波子汽水軟雪糕可以減6蚊雞呀~

叫得郵局當然就有postcard同郵筒啦~ 好多款呢~ 即場寫完仲可以揀選寄出嘅月份，再投入「未來郵筒」，多啦A夢仲會即時回信添~

期間限定：即日 至 2月28日

文、相、片：Kar