夏日飛台灣－必試台灣7大消暑冰店

呢個暑假買咗便機票未先？我估你哋唔少人都會去台灣啦，睇呢篇文就啱，夏日，唔單止為大地帶來美腿，仲有各式各樣消暑甜品！喺台灣，享受食冰係件快活嘅樂事：老字號嘅傳統剉(挫)冰、訴求健康天然嘅手工冰淇淋、喺老房改建嘅鋪頭吃冰......五花百門一切任君選擇，但唔理係邊隻，都可以帶俾你透心涼嘅感覺，為你喺旅程中注入新能量！開飯仔就根據「2016 OpenRice台灣百大心水餐廳」，精選出台灣必吃必訪、就算唔吃都唔可以唔知嘅超人氣冰店，快啲跟著我嘅腳步，一齊食遍全台熱門冰店啦！

百大心水餐廳名單結算期間係2016年2月，係依據過去各餐廳於OpenRice上好評減去劣評數目作為基礎，再依據食評總數、食評品質及時間性作出調整後，加上總瀏覽數同收藏數綜合計算，而得出嘅結果。

8% ice 冰淇淋專門店

Photos by mika出走美食日誌
一間有幾層高嘅超大型食冰店，鋪頭以黑色作為主色系，鋪滿落地玻璃，增添咗文藝同神秘氣息。店內賣著各種色彩繽紛用新鮮水果而製嘅雪條，同特別口味嘅義大利雪糕，全部都標榜採用當季天然食材製作，而且唔添加任何香料及色素，夠哂健康。好似個蜂蜜焙茶雪糕咁，蜂蜜帶嚟咗濃郁嘅甜味，又被烘培過後嘅茶香褪去咗過剩嘅甜膩，多咗清新嘅感覺。另外，仲有宮鴣雪鹽黑糖牛奶配一保堂抹茶雪糕，都值得推介，一保堂抹茶喺日本係頂級抹茶，味道綿密香濃，港女們又點可以錯過呢？

小涼院霜淇淋專門店

Photos by 李米的大餐小食 & 太霏糖的小天地

小涼院每日都會提供單一限定嘅雪糕，目前已研發出十幾種口味，多數係季節水果、茶類同酒類等口味，味道特別到你聽都未聽過。好似伯爵茶龍舌蘭雪糕，係以唐寧嘅伯爵茶為底，再加上龍舌蘭酒提味。另外較特別嘅仲有番石榴雪糕，店主將酸甜不同嘅番石榴融合，再搭配微量海鹽提味，最後喺雪糕鑲上一小塊紅心番石榴，旁邊再淋上番石榴泥，賣相好鬼吸引。

張豐盛花生之家

Photos by 塔塔。食用筆記
張豐盛花生之家其實係一間辦年貨嘅鋪頭，但估唔到嘅係，入面竟然有雪糕賣。客人可以自由選擇雪糕配料，配料大多係傳統食品如花生粉、芝麻粒、南瓜子等，好有創意。客人一選擇好後，機器就會將粉粒融合到雪糕之中，包保你嘅雪糕夠哂味。

宮原眼科

Photos by ♥～珍妮佛的花草呢喃～

Photos by Joooyce Chung

見到個名唔洗驚，因為呢棟建築物曾經係眼科醫院，所以得以命名，入面裝修行巴洛克風格，挑高大廳搭配聳立巨形書架，古色古香到好似身處霍格華茲咁。呢度有百幾款雪糕任君選擇，單係朱古力味就有十幾款，真係地大就是任性！揀好雪糕之後，就到配料－為一大highlight之一，有鳳梨酥、龍眼蜜、乳酪蛋糕等，拼落雪糕度又抵食又特別。

路地手作り氷菓子

Photos by 滴莉雪絲

係一間日式雪糕店，店家堅持用牧場直送鮮乳，所以有番咁上下品質保證。呢個抹茶雪糕旁配搭一粒白玉湯圓同紅豆泥，湯圓煙韌，紅豆綿密，雪糕茶味較重而且偏苦，底下的鯛魚仲係溫熱，搭上凍冰冰嘅雪糕一齊食，呢種冰與火嘅交融，絕對顛覆你嘅味蕾。

泰成水果行

Photos by mika出走美食日誌
嫌食雪糕太膩？咁就嚟泰成食水果冰啦！店家用新鮮水果打成各式各樣嘅甜品，最吸引嘅係哈密瓜瓜冰，老闆將哈密瓜挖成一球一球嘅哈密瓜球，之後再用半個哈密瓜當容器，裡面鋪上小碎冰，再將哈密瓜球放上去淋上煉乳。喺碎冰嘅冰鎮作用下，哈密瓜維持冰涼嘅口感，啖啖都有透心涼嘅感覺。

冰鄉

Photos by 大阿姨珍妮
一間超有誠意嘅傳統刨冰店。點解？因為佢俾你啲水果係可以擺滿成個盤，多到你睇唔到啲刨冰咁濟。就好似呢個草莓牛乳冰咁，一粒粒又新鮮又大嘅草莓滿鮮紅奪目，加上滿滿嘅煉乳，酸酸甜甜，搭配埋刨冰更加係清涼，咁都只係85蚊台幣，性價比超高。

隨時接收最新資訊
讚好OpenRice專頁！