壽司郎進軍甜品界/牛涮鍋新出湯底膠囊？四月一日限定概念新品！

正所謂「創作力量同幻想會嚇你一跳」，四月一日愚人節唔少餐廳都會趁機出只此一日嘅新品概念圖。今年從食得嘅「精醞湯底膠囊」到可能係全球首個港人回憶主題樂園都有出現！

壽司郎香港首間壽司郎甜品店

唔少人去壽司郎必食嘅唔係壽司，而係卡達拉娜或者牛奶軟雪糕加抹茶粉！有感大家都覺得壽司郎係「被壽司耽誤嘅甜品店」，佢哋宣佈將會開設香港首間「甜品專門店」，供應回憶中嘅啫喱糖同芝麻糊湯圓啊！留言要求開到18區都有先得！

牛涮鍋獨家研發精醞湯底膠囊

以後掛住日式Shabu Shabu都無有怕！牛涮鍋推出Mou Mou精醞湯底膠囊，一粒膠囊加1L水就還原到餐廳招牌湯底，一盒24粒有齊八款湯底口味，每次都可以試唔同款。實在係居家旅行、露營過夜，必備良藥！下面唔少網民立刻留言「2盒thx」。

譚仔三哥米線三哥名湯泡泡浴鹽

譚仔三哥最近唔單止正式登陸日本，喺香港亦聯同女神阿Gi樊沛珈推出三哥名湯泡泡浴鹽，專門設計畀各位三哥忠粉可以喺自己屋企Homecation！有甜美番茄湯味同特辣麻辣湯味兩款名湯，適合任何皮膚人士，唯一要擔心嘅係可能會越浸越肚餓？

譚仔雲南米線麻辣香「譚仔米．扇」

譚仔亦推出可能係譚仔姐姐最愛嘅譚仔米．扇，顧名思義、每把譚仔米．扇都係用63萬條米線交織而成，加上以麻辣湯長時間烹煮，有陣陣譚仔麻辣香氣～官方話呢把譚仔米．扇可以散熱又可以解辣，甚至任何煩惱都可以一「撥」而空！

波仔重金鉅製環球主題樂園

圖: 餐廳Facebook

邊個話香港得兩個主題樂園？第三個即將由波仔覓地興建，標榜100%本土特色，以波仔產品打造屬於港人回憶嘅主題樂園咁話！包括波仔糖水創作嘅華麗海上摩天輪「甜水幻想曲」，有重重四川辣椒陣嘅狂野過山車「辣雞戰煲」，夠晒刺激。

以上「概念」純屬虛構，愚人節快樂！