相信呢一兩年，好多人都好掛住去日本旅行嘅感覺，成日都要喺香港尋找「偽日本遊」嘅活動。最近喺堅尼地城有個新興嘅打卡熱點「八一蔵」，一站集結爐端燒、和洋餐廳、大阪人氣麵包店等於一身。

淳吟·峠（西環）

淳吟係位於北海道札幌巿嘅一個地方，而峠則有山峰之意，餐廳以此命名，門口設計亦有如山洞嘅入口，好似有種帶人瞬間穿越去到北海道嘅感覺。駐場嘅日本師傅料理長有超過25年嘅日式料理經驗，曾經serve過多名國際巨星同名人，食物質素絕對有保證。

慢煮鵝肝芝士

唔好睇輕呢道細細碟又細細粒嘅菜式，背後花咗唔少心機呢。方形嘅芝士混入咗鵝肝、日本豆腐同忌廉芝士，慢煮兩個鐘製作，再加上劍魚魚子喺面；而旁邊嘅青森蘋果亦浸過日本白酒一兩日。建議可以先食鵝肝芝士，再食蘋果，然後第二round先至點埋橄欖油黑醋汁，咁就可以食出層次嘅變化。鵝肝芝士口感軟滑得嚟又間中咬到爽脆魚子粒，口感豐富，鹹香剛好。芝士同鵝肝本身多食會易膩，不過加埋豆腐之後就有平衡嘅作用，感覺冇咁heavy，食埋蘋果就更可中和膩感。

帆立貝甘海老海膽刺身&魚子醬汁

食日本菜當然唔少得刺身，師傅將幾款最鮮甜最多人鍾意嘅刺身配搭埋一齊，帆立貝、甘海老、海膽都係由北海道每日空運直送到港。有別於一般嘅刺身豉油，師傅特意將三文魚子榨汁，加入秘製豉油，令到刺身唔止有自身嘅鮮味，亦帶有陣陣微鹹鮮甜香氣，鮮上加鮮。加埋魚子醬同食用金箔，就使成道菜式再增添咗一啲奢華感。

法式關東煮

製作關東煮時，師傅落咗少少twist，喺傳統嘅鰹魚湯汁中，加入洋蔥清燉，令到呢道關西嘅名物多咗法式嘅風味，以慢火熬煮嘅湯底亦多咗份清甜。關東煮內有8種時令食材，以日本蔬食為主，同平時見開嘅亦有所不同，師傅更會即席為客人刨刮芝士呢。特別推介京都名物赤人參，即係紅蘿蔔，但比一般食開嘅紅蘿蔔甜得多啊；另外，北海道豬肉腸嘅豬肉味亦頗濃香。

洋風生蠔蒜油煮

呢道菜式則選擇以西班牙風呈獻，各種食材包括幾款海鮮：生蠔 、帶子、蝦、蜆都係來自日本，以蒜油煮香，再加入橄欖油同日本酒盜煮熟，上菜時更以火溫保熱，啖啖暖笠笠最啱冬天食。生蠔濃香creamy，帶子則爽口鮮甜。 另外配有蒜蓉包，可以點埋湯汁一齊食，蒜香中滲出陣陣橄欖油香。

和牛肉拌生海膽汁

必試嘅菜式仲有和牛肉拌生海膽汁，選用A4宮崎和牛肋肉，師傅先以爐端燒方式輕燒過牛肉後，再以鐵板底燒和牛膏後進行二次燒，使牛肉生熟度剛好之餘，更加索盡牛汁，肉質軟腍又有滿滿肉汁同脂香。而除咗眼見嘅海膽之外，原來豉油都混入咗海膽自家調製，味帶甘甜，口感豐富呢。

Eclipse by Luna Cafe & Bar（西環）

同層嘅另一間餐廳，則以和洋美食為主，食材大部分均由日本直送，日間主打輕食、咖啡，夜晚會有啤酒供應，而甜品更會由人氣北海道芝士蛋糕品牌Luna Cake提供。

鮭魚他他· 脆法麵包

幾片香脆嘅脆法麵包上，鋪上多款食材，淨係三文魚都有兩種：新鮮三文魚同煙文魚，再加埋三文魚子提鮮，食落唔止有鮮味，仲有煙燻香，兼且有微微酸𠻹。原來係由蛋黃汁加師傅自家製嘅乳酪汁散發出嚟，微酸有助中和油膩感呢。

芝士班尼迪鱈場蟹肉吐司

黑色吐司以竹炭粉製，面頭嘅軟殼蟹架勢十足，切開原來仲勁，唔止有蛋汁流出，吐司入面有炒香過嘅蟹鉗肉、雜菌、洋蔥等。一啖放入口，既香脆亦creamy，菇香中又伴隨住陣陣巴馬臣芝士嘅鹹香。

北海道芝士海膽卡邦尼意粉

聽個名就知道呢個意粉極度creamy，師傅特意選用意大利出口嘅粗身闊蛋麵意粉，一嚟口感爽身啲，二嚟粗身啲掛汁力亦高啲。混合加拿大海膽、煙腩、味啉同海膽醬等製作嘅意粉，鮮味濃郁，加埋清酒同忌廉煮出嚟嘅醬汁，鮮得嚟仲帶有酒香。

魚介鰹魚白魚風味意粉

至於呢款意粉，則選用相對上幼身少少嘅蛋麵，同樣都係意大利出口，但麵質就會滑身啲。加入日本魚介粉、日本菇菌同白魚製作，啖啖都有魚介嘅香味，面頭嘅乾白魚仔可以話係神來之筆，為整道菜式增添咗脆卜卜嘅口感。

和牛三重芝士漢堡·薯條

講到吸睛同打卡之最，非呢個和牛三重芝士漢堡莫屬，成隻飛碟咁大嘅芝士脆片，一放出嚟已經贏晒，忍唔住會係咁搣嚟食。脆卜卜，又超濃嘅芝士鹹香，絕對會食唔停口。牛肉自身有濃郁嘅肉香，加埋自家製嘅BBQ汁、芥末籽、同沙律醬已經好夠味，但師傅仲要加埋車打芝士同mozzarella，層次變化又多咗。

心動不如行動！有興趣就快啲約埋三五知己去嘆下美食！快啲bookmark定啦！

*以上圖片只供參考，所有食品以實物為準. 食品供應因餐廳而異