藍田啟田街市重開啦！今次回歸仲帶嚟小食街，營業時間更加去到凌晨兩點！今次同大家細數各間小食店嘅特色，同埋有咩係必食，藍田友又係時候同朋友掃街啦。
 

台灣人 - 真正台灣人打骰！必試紅燒牛肉麵

開宗明義主打台灣嘢，最啱成日都「心在台灣夜市」嘅朋友！牛肉麵同大腸麵線固然係主打，牛肉麵湯底用上蔬菜同藥材熬製，味道濃郁，半筋半肉牛腱肉質軟嫩又厚身，同湯頭好夾；葱油餅唔算好多葱花，但勝在熱辣辣又夠香脆！蚵仔大腸麵線都幾抵，份量又唔細。整體味道係唔錯，唯一要彈嘅係滷製豬大腸唔夠入味。

紅燒牛肉麵（＄38）

塊塊都係半筋半肉

葱油餅（＄15）

蚵仔大腸麵線（＄25）

 

皇后餃子 - 材料每日鮮造！手工餃子配辣菜脯

檔仔以即包即煎餃子做主打，分湯餃、煎餃同炸餃。店內最好賣嘅係鮮肉韮菜同京葱牛肉，而芝士鮮肉粟米就好啱細佬仔食，粒粒粟米唔呃秤！而且餡料配搭得宜，以鮮肉韮菜做例子，肉同韮菜比例平均，食落去肉味幾濃。重點係配上老闆娘自家製辣菜脯，既爽脆又辣得過癮，十分開胃！
 

鮮肉芝士粟米餡煎餃（＄10/3隻）

鮮肉韮菜湯餃（＄20/6隻）

 

燒賣王子 - 每日手造燒賣＋魔鬼炸脾

招牌手工燒賣嘅魚肉自家手打，等嘢食嗰陣仲可以見到燒賣製作過程！魚肉餡蒸熟後食落彈牙得嚟又夠大粒，15 蚊 6 粒性價比高。同場加映大大隻魔鬼炸脾，重到夾起時會墜手！另外佢仲有「鐵板系列」炒粉麵，香味吸引而且分量亦唔細。

魚肉燒賣自家打造

自家手工燒賣（$15/6粒）

惡魔炸雞髀（＄20）

 

豆腐時代 - 豆腐沙冰＋傳統釀豆腐

除咗有常見嘅豆腐花製品，亦有豆腐為主嘅鹹食。甜食豆花可以配芝麻糊、紫米露、芒果汁等等，再加芋圓、珍珠或鮮果都得！而豆腐沙冰就有齊豆腐花同豆漿沙冰，口味以朱古力同抹茶最受歡迎。另有煎魚肉豆腐、客家釀豆腐等小食，亦可以變成麻婆豆腐飯或者豆乾韓式炒粉絲等飯麵，配搭多元化。

芝麻豆花（$12）（加芋圓+$4）

朱古力豆腐沙冰（$12）

釀豆腐每日新鮮即製

客家釀豆腐（＄15/4件）

 

 
燒洒一族 - 脆皮豬手 + 酒醉小食

主打西式燒味嘅小店，店內有燒爐，德國燒豬手皮脆肉嫩最啱加餸或者送啤酒！最近仲新增麻辣同酒醉小食，後者全部用上由花雕酒同鹵糟醃成，酒醉溏心蛋十分入味，溏心蛋黃陣陣酒香好吸引！

德國燒豬手（大）（$88/隻）

酒醉溏心蛋（$22）

酒醉系列小食受街坊歡迎

店方亦有麻辣系列小食

 

真味皇 - 足料碗仔翅 + 香口牙籤雞

有多款港式小食選擇，招牌係金牌火鴨絲碗仔翅同火鴨湯底魚肉湯，份量都算足料。牙籤雞係一款汕尾小食，唔單止一口 Size夠方便，沾上脆米嘅外層仲好香口！同時亦有提供老火湯，每星期都會更換款式。
 

金牌火鴨絲碗仔翅（$25）

牙籖雞（＄20）

 

麗港滷鵝 - 咖啡豬手

麗港軒潮菜館大廚坐陣，咖啡豬手係鎮店之寶，當然必試！亦有多款潮州滷水小食，例如蠔餅、滷水鵝片等等。鋪頭外面有唔少街坊排隊等買滷味，可見都幾受歡迎！

咖啡豬手（ $70/份）

啟田市場
地址：藍田啟田商場地下

文：Timothy
相、片：Timothy，Cathy