好多人鍾意酒店嘅靚環境，原來而家去酒店食餐好都可以好環保㗎。因為全港依家有超過1,800間餐廳參加「咪嘥嘢食店」，當中包括唔少酒店餐廳。佢哋妥善安排食材存放，大大減少浪費之餘，仲有好多「惜食」措施。

平時約飯局都想支持大嘥鬼同埋「惜食香港」運動，可以經OpenRice進階搜尋出全港「咪嘥嘢食店」，連埋大家食幾多嗌幾多嘅加持，一齊為環保出分力。今次開飯仔走訪城景國際酒店“Amazing”，同埋荃灣西如心酒店“Café Circles”，睇吓呢兩間鑽石級嘅「咪嘥嘢食店」有咩減少廚餘嘅招數先。

經OpenRice Apps 進入「進階搜尋」，揀選「菜式」就可以搵到咪嘥嘢食店喇。

【城景國際】泰式&東南亞美食“Amazing”
一行入城景國際大堂就見到木系x園林景緻嘅用餐環境，“Amazing”餐廳有高樓底玻璃天幕滲透日光，節約能源又有大自然氣息，啱晒享用泰式同東南亞料理。

“Amazing”餐廳有高樓底玻璃天幕滲透日光，節約能源又有大自然氣息。

“Amazing”大廚主張不時不食，因應時令季節而採納食材，所以每季都會更新菜單。2025年春天餐廳就有一系列海鮮料理，好似呢道香煎深海比目魚柳 配牛肝菌忌廉汁就係用環保海鮮入饌。採用呢類海鮮可以確保捕撈方法唔會導致魚類種群數量大幅下降，保護海洋生態系統，例如避免過度捕撈、避免拖網捕魚、減少誤捕其他海洋生物(如海龜、鯊魚或海鳥等)，盡力保護海洋生態系統。

深海比目魚魚皮煎到好香脆，魚肉依然嫩滑。伴本地有機水耕菜沙律，相當清爽。

另一道錫紙焗西班牙鯖鱈魚柳鮮蝦慕思伴龍蝦汁除咗選用環保海鮮外，更善用食材，將用嚟烹煮鮮蝦慕絲嘅剩餘蝦殼，連同龍蝦殼一齊熬煮成龍蝦汁，鮮味濃郁又可以減少產生廚餘浪，一舉兩得。

將香炒菇菌、鯖鱈魚柳、龍蝦汁等一同烤焗，上枱時剪開錫紙即刻香氣撲鼻。

其實我哋日常都可以花啲心機盡用食材，好似呢杯Amazing Cooler就係用沙律吧切出嘅菠蘿、青瓜、西芹頭尾打製而成。雖然菜頭菜尾入饌沙律唔夠精緻，但絕對係可以食用，一樣新鮮香甜。大家不妨喺屋企試吓用盡蔬菜食材，自製果汁啦。

善用食材剩餘，將新鮮蔬菜打製成果汁，依然新鮮香甜。

善用剩餘食材之餘，配合嚴格管制餐廳存貨量、適當儲存，減少廚餘嘅效果更相得益彰。“Amazing”定期盤點存貨量、核對食用期限以減少浪費食材。並依照「先入先出」的原則，將最早購入嘅食材放於當眼處，並由舊至新次序使用食材存貨，就可以避免食材過期變壞而浪費。我哋屋企廚房收納，都可以參考呢啲小技巧㗎。

依「先入先出」原則使用食材，可以避免過期變壞而浪費。

正確控制溫度避免腐壞儲存食材同樣重要。“Amazing”對每個雪櫃溫度有嚴格標準，並會每日檢查冷凍食材設備維持於0℃-4℃。同時特設獨立雪櫃擺放新鮮沙律蔬菜，確保蔬菜安全衛生。餐廳職員每晚亦會清潔所有廚房設備，防治蟲鼠出沒，避免食材因受污染而未能入饌，造成浪費。

正確控制雪櫃溫度，維持於0℃-4℃避免腐壞。

餐廳有咁多減少廚餘嘅措施，咁我哋嚟食嘢又可唔可以出一分力呢? 其實“Amazing”餐牌都細心地提示顧客可以按需要選擇飯量，自問細食，可以揀少飯，餸菜食唔晒都可以打包㗎。

另外，城景國際早年已致力廚餘分類回收，進一步減少堆填區壓力。酒店喺準備食材地點及員工飯堂均設置廚餘回收桶，同時張貼告示教育員工進行廚餘分類。時至今日，酒店已經獲取多個環保認證，更同其他機構一齊推動可持續發展政策，希望減低廚餘對環境造成影響。

餐牌細心地提示可以選擇飯量。

於準備食材地點及員工飯堂設置廚餘回收桶，減低廚餘對環境造成影響。

除咗酒店餐廳實行一系列環保措施，城景國際酒店嘅員工飯堂亦同社福機構合作，將每日飯堂剩食妥善密封再捐予有需要人士。

員工飯堂取餐處，放置宣傳海報。

員工飯堂將剩食妥善密封保存，再捐予有需要人士。

【荃灣西如心酒店】國際自助餐&自選菜單“Café Circles”
自助餐迷唔可以錯過嘅“Café Circles”，自助區有多個即席烹調區域，半開放式嘅用餐空間可以欣賞荃灣繁華景觀，用餐體驗好圓滿。呢度亦可以自選菜單，餐廳亦提供素食餐單、水耕蔬菜等，如菠菜和茴香伴蒜香汁配蔬菜沙律、彩虹沙律配檸檬油醋汁等，清爽健康。同時引入環保海鮮，確保唔過度開發海洋資源，避免影響海洋生態，好似招牌菜香煎比目魚配蘆筍都好受歡迎㗎。

“Café Circles”為減少食材浪費，花盡心思餐單設計，將食材物盡其用。例如魚嘅邊角料會用嚟煮魚茸、魚湯、炸魚頭咖喱醬等；蔬菜邊角料亦會變成蔬菜煎餅，運用創意活用食材。

“Café Circles”花盡心思餐單設計，將食材物盡其用。

源頭減廢第一步，當然於採購食材開始。所以如心酒店集團訂立標準作業程序，管理採購、生產、消費、廢物處理。配合控制入貨量措施，避免因食材過多而導致腐爛。

同時，如心酒店集團實施防治蟲鼠措施以防止食材受到污染，從而減少食材因衛生問題而須要丟掉。員工亦會控制儲存溫度，並確保食物製作時安全及清潔。我哋平時都可以留意雪櫃溫度、廚房環境衛生，減少浪費食材又食得安心。

食物製作時確保安全及清潔，減少浪費又食得安心。

如心酒店集團亦有妥善處理剩食。集團自2017年起同社福機構合作，集團旗下酒店—荃灣西如心酒店、南灣如心酒店、九龍東如心酒店均會捐贈剩食予有需要人士。

如心酒店集團亦積極參與環境保護署嘅「廚餘收集試驗計劃」。集團旗下每間酒店均設置廚餘回收桶，以便收集廚餘。部分廚餘亦會送到有機資源回收中心處理，轉化成電力及堆肥。

如心酒店集團旗下酒店設置廚餘回收桶，以便收集廚餘。

當環保措施得到員工理解同配合，一定會進行得更順利。所以如心酒店集團會定期舉辦環保主題活動及講座，例如參觀有機資源回收中心，以加深餐廳員工對廚餘處理嘅認識。此外，餐廳亦會提供專業培訓同指引，確保員工會清晰地向大家介紹食物份量選擇，並主動詢問需唔需要外賣盒打包剩餘食物。

想為環保行多步，打包可以自己帶埋外賣容器𠻹。“Café Circles”推廣「自帶容器」計劃，凡自備容器購買飲品即享減HK$3優惠；購買食品則可減HK$5優惠。

自選菜單提示食客可要求少飯/少麵。

滑蛋黑松露蝦仁配香苗、時令蔬菜及中式餐湯。菜式豐富，選擇少飯都食得滿足。

除咗主動嗌少飯/少麵同埋打包剩餘食物，原來“Café Circles”都歡迎大家自備容器將餐廳嘅咖啡渣帶返屋企。唔講都唔知，原來咖啡渣可以用嚟制作天然肥料、除臭劑，甚至皮膚去角質產品都得㗎。

“Café Circles”歡迎大家自備容器，將咖啡渣帶返屋企。

一齊發掘更多咖啡渣用途啦。