咖啡世界同葡萄酒世界一樣咁宏大，唔同產地、莊園、種植及處理方法以至烘焙及拼配，都可以帶來各種風味。不過相信每個啡友都有自己嘅偏好，有人鍾意果酸、有人喜愛甘苦，所以飲到一隻完全符合自己心水嘅咖啡並唔容易！

精品咖啡店The Coffee Academics Roastery於中環開設pop-up店，並非只得咖啡飲，更設有Custom Blending Bar，可以度身訂造個人專屬咖啡豆！咖啡師Ed稱：「首次推出嘅Custom咖啡調配服務，可以根據生活習慣、個人口味等，拼配出你喜愛而且獨一無二嘅咖啡豆。」

客人先用iPad回答問卷，包括鍾意咩音樂、旅行模式，然後最重要嘅咖啡味道、body同aftertaste，最後就揀齋啡定加奶飲、沖法等。鍾意聽咩歌同飲咖啡有咩關係？Ed話：「主要影響到飲咖啡嘅mood，鍾意聽Rock嘅人，口味可能偏向重啲！」

總共有27種來自世界各個咖啡豆產地嘅咖啡豆，非洲、中南美洲、亞洲，甚至連中國雲南都有！拼配就會由咁多款咖啡豆挑選出三款，以40%、40%及20%比例混合，有成千種mixing，而全部都係中度烘焙，唔會太淺或過深，用唔同沖法都可以保持到咖啡風味及複雜性。

咖啡豆有兩個價錢，Premium ($238/200g)用上80分以上咖啡豆，再貴少少嘅Award Winning Micro Lot ($368/200g)會包括埋公平貿易咖啡豆、Cup of Excellence及較罕有嘅微批次等，著名巴拿馬藝妓都有兩款。部分咖啡豆有社會責任元素，如中國雲南出產嘅咖啡豆可以幫助到少數族裔，巴西Direct Trade咖啡豆係來自Women in Coffee活動，可以幫助到當地婦女，而洪都拉斯咖啡豆亦幫到當地兒童及青少年。

咖啡師會即席喺客人面前拼配，成個過程最快20分鐘就可以完成，亦可以選擇需唔需要磨粉、幾時取貨等，相當方便。而且亦可以揀包裝貼紙，寫埋名，送禮自用都得。

<

Ed話暫時客人口味都幾平均，以Choco、Nutty大路口味為主。開飯仔嘅個人拼配係以混合哥斯達黎加、秘魯同埋印尼蘇門塔臘而成，以果仁味為主，medium body得來有長長餘韻，飲落好舒服。但咖啡好講個人口味，所以想調配獨一無二又適合自己口味嘅咖啡豆，就要去為期六個月嘅pop-up店喇！

The Coffee Academics Roastery

地址：中環金融街8號IFC 3樓LA5

營業時間：10:30am-8pm

文、相、片：Perrins