連周杰倫都要去嘅火鍋店？原來銅鑼灣呢間新店由周杰倫朋友開設，仲搵嚟有15年西餐同日法料理經驗嘅總廚坐陣，以唔同創新湯底，配搭香港首度引入嘅日本日山A5和牛、自家製意大利麵、新鮮海鮮、大埔振興肉丸等，新鮮感十足。
 

總廚Ken（左二）師承日本名廚小西充，將西餐同日法料理精神糅合到火鍋當中，難怪周杰倫（中）都嚟撐場！

Tasting Menu逐一睇

Tasting Menu（$498/位起）

J Pot裝修以音樂同表演為主題，主打精緻而有玩味嘅餐飲概念。餐廳亦特別設計一份Tasting Menu！結合中西風格，既按照西餐每道菜式逐一上菜嘅方式，亦保留中式大家一齊圍住邊爐「烚下烚下」嘅熱鬧氣氛。
 

意式海鮮薄片（圖為1人份）

小食拼盤（圖為1人份）

頭盤先嚟兩道完全唔同風味嘅菜式，意式海鮮薄片由廚師挑選當日新鮮海鮮，例如吞拿魚等再腌製。而小食拼盤就有和牛春捲配格魯耶爾芝士，同自家製鱈魚皮，香脆惹味。
 

（左）「頭啖湯」松茸野菌雞湯，（右）「頭啖湯」海膽麵豉湯（圖為1人份）

「頭啖湯」滋補花膠湯（圖為1人份）

「頭啖湯」係希望大家圍爐前先品嘗湯底原味，會由店員席前倒入湯底精華！Tasting Menu三款特選湯底都各有特色，松茸野菌雞湯用自家製松茸野菌清湯加入春雞，令松茸野菌風味更突出；滋補花膠湯特別以意大利巴馬火腿代替金華火腿令味道更柔和，「頭啖湯」更會加入魚子醬用炸藜麥增加口感；海膽麵豉湯用北海道海膽配搭白味噌，味道鮮甜濃郁。
 

日山和牛拼盤（圖為4人份）

係香港首度引入日山和牛！日山係日本一間超過百年歷史嘅頂尖肉類供應商，主要供應青森同岩手縣嘅黑毛和牛，油花紋理精細。餐廳有10款唔同部位同切割方法嘅日山A5和牛，而Tasting Menu嘅拼盤就由廚師挑選當中三款，好似開飯仔拍攝呢日就有西冷、牛臂股肉，同上後腰脊肉。
 

本地海鮮拼盤（圖為4人份）

各地海鮮每日新鮮運到，同樣由廚師挑選當日新鮮款式，拍攝當日就有海鱸魚、美國青口，同虎蝦。另有馬尼拉蜆、日本帶子、東星斑、美國桶蠔、本地珍珠龍蝦等每日輪流供應。
 

精選火鍋料理（圖為4人份）

餐廳唔少食材都係自家製，好似呢度就有自家製和牛牛肝菌意大利雲吞同白蘿蔔田螺餃子，配搭創新。而肉丸就由大埔振興肉丸供應，品牌有超過50年歷史，堅持香港製造、原汁原味無添加，當中牛蒡魚蛋更係J Pot獨家供應嘅復刻口味，牛骨濃汁牛丸就係品牌皇牌口味。開飯仔拍攝呢日有零添加牛筋丸同豬骨濃汁貢丸，同樣出色。
 

自家製意大利麵（圖為1人份）

Tasting Menu嘅意大利麵會好似西餐主菜咁，由廚師幫大家用挑選好嘅湯底口味烹調餐廳手工製作嘅意大利麵。每日會有三款意大利麵選擇，總廚建議湯底較淡味可以選擇幼身麵，好似開飯仔呢碟就係滋補花膠湯配幼麵。相反例如海膽麵豉湯味道較濃，就可以揀粗身啲嘅意大利麵啦。
 

滋補花膠湯（另加$198）

Tasting Menu除咗三款特選湯底之外，亦有和牛清湯同法式海鮮湯選擇。和牛清湯用日山牛肉、牛骨、蔬菜等熬煮兩日，最能夠帶出日山和牛原味。法式海鮮湯靈感源自法國菜當中嘅海鮮濃湯，集各款海鮮精華。
 

甜品拼盤（圖為2人份）

唔單止配料多元化，嚟到Tasting Menu最後嘅甜品拼盤亦係會不定期更換款式，畀大家更多新鮮感。拍攝當日就有日本京都宇治抹茶配茉莉花泡沫海綿蛋糕、黃金鹹蛋糯米糍，同金箔椰子芋頭慕斯。
 

 
單點配料、飲品精選

脆炸和牛響鈴（$78）

和牛吉列薯餅（$98）

海鱺魚薄片配柑橘汁（$198）

兩款香口小食都以日山和牛為主，脆炸和牛響鈴係少見嘅三角形，裡面係和牛肉。而海鱺魚薄片配柑橘汁就較為清新，特別係柑橘汁味道酸甜，最啱夏天享用火鍋前醒胃。
 

自家製意大利麵（各$58/180g）、自家製意大利雲吞（$58起）

打邊爐食烏冬或者公仔麵就試得多，配意大利麵或者意大利雲吞又試過未？呢度有八款自家製意大利麵同四款自家製意大利雲吞任君選擇，意大利麵選用意大利00級麵粉、日本雞蛋等製作。
 

（左至右）紫菜芝麻汁、海膽醬油、法式羅望子油醋汁（各$30/款）

如果湯底選擇和牛清湯或者白菜乾馬蹄湯呢兩款清湯，會建議加配特製調味醬汁，分別搭配唔同嘅食材：紫菜芝麻汁配蔬菜、海膽醬油配肉類、法式羅望子油醋汁配海鮮，三款醬汁都係以食材鮮味為主，無添加任何味精。
 

（左至右）茉莉花檸檬雪梨果茶配蜜糖珠（$68）、香桃烏龍果茶配熱情果珠（$68）、黑糖寒天珍珠奶茶（$48）

飲品亦相當花心思，好似花茶都係比較清新嘅配搭，而且有爆漿效果嘅果珠或者蜜糖珠增加口感。而黑糖寒天珍珠奶茶當中就無台式珍珠，而係以伯爵奶茶配黑糖寒天，甜度適中唔會過膩。
 

J Pot
地址：銅鑼灣謝斐道535號Tower 535 1樓

文：Cathy
相：餐廳提供、Cathy
片：Cathy