深水埗已經唔單止係買平嘢嘅鴨寮街，或者買布、皮革嘅舊區咁簡單。隨住一間又一間嘅日式雜貨小店同咖啡店進駐，深水埗已經成為咗一個文青集中地啦！今次就等開飯仔向大家一一介紹深水埗嘅文青cafe，大家記得mark實啦！
墨綠旋轉樓梯打卡 Colour Brown x PHVLO HATCH
路過呢間cafe，絕對會畀佢嘅門面所吸引到呀！樓高3層，以墨綠色、金色為主調，感覺相當復古。Cafe嘅室內設計走復古水泥工業風，仲有一座旋轉樓梯，空間感十足，打卡位勁多呀。食物多元化，唔單止有普通輕食，仲有香港人最愛嘅出前一丁添。特別一提佢哋嘅「意式咖啡鴛鴦」，結合espresso同手沖嘅奶茶，飲落非常有層次。
白色簡約風 Coffee of the Day
呢間cafe可以稱得上係深水埗嘅「一點白」，白雪雪主調真係相當吸睛！cafe以白色為主色，配搭水泥同木板質感，感覺簡約清新。餐廳暫時只提供咖啡，不設輕食。每杯飲品都會附上一張寫住打氣字句嘅紙仔，幫大家注入正能量。最近咁熱，不妨試下有氣泡口感嘅Espresso tonic，或者季節限定，味道酸酸甜甜嘅西柚特飲啦。
日系立飲cafe Press The Button Coffee
圖﹕技巧樹熊
呢間cafe走簡約日系風，主打外賣所以得兩個企位。不過企喺大大個落地玻璃窗前歎咖啡，感覺都幾chill吖。主打日本咖啡豆，呢期手沖豆選自京都嘅circus coffee。意猶未盡嘅話，可以買埋「麵包時間」掛耳式咖啡包返屋企配唔同麵包！
真文青必到 openground
呢間cafe同樣走簡約風，牆上貼滿不少關於香港議題嘅海報，令到白色嘅cafe一啲都唔單調。Cafe除咗提供咖啡之外，仲有果汁、茶飲等，誠心推介佢哋嘅dirty，熱嘅espresso配上凍牛奶，香濃嘅咖啡味同鮮奶香，好有層次。自認係真．文青嘅話，不妨上cafe嘅樓上參觀不時更新嘅開放式展覽啦。
特色咖啡果茶 Café Sausalito
深水埗不止有簡約風cafe嘅，呢間cafe嘅裝修就偏歐美風，檯櫈都選用深木色，感覺相當有情調。一般嘅咖啡種類都有提供，而最特別嘅莫過於咖啡果茶啦，以咖啡豆外層嘅果實泡茶，味道酸甜，但又帶有淡淡嘅咖啡香。週末不定期仲會有Live Band表演！
文：Kiko