聽講「愛對了人，就天天都是情人節」。唔一定要搵個肯陪你食M記嘅女朋友嘅，假如佢肯喺情人節當日，唔要求食貴夾唔飽淨係得個景同氣氛嘅情人節大餐，而係肯同你食又平又抵食嘅另類情人節特餐嘅話，就真係愛呀哈利！
譚仔三哥 十小辣朱古力
圖：拖羅大白鯊
譚仔三哥可以話係長期行親民路線嘅米線店，勿演懶肉實小辣深得一眾窮鬼歡心，一碗唔夠嘅話叫埋土匪雞翼就啱啱好，再唔係嗌碗過橋米線乜料都有唔使煩又飽肚，請埋囡囡食最多咪一百蚊就落得樓。
今個情人節，三哥仲要出招，食完碗米線，仲有甜品食添呀！三點開始就會送「辣之戀人」——十小辣朱古力！又辣又甜嘅感覺，你哋應該好熟悉啦？不過咪話開飯仔唔提你，朱古力數量有限，送完即止呀，唔係等陣一個唔小心，又中咗十萬個激嬲女朋友嘅理由呀科科。
海皇粥店 情不自禁炒米粉
圖：簡簡單單食碗粥就滿足嘅話，做人都幾開心吖~ 海皇出咗個放閃餐，連啲名都sweet池過人嘅，一陣又「含情脈脈艇仔粥」，一陣又「情不自禁炒米粉」咁，仲要$99就埋到單，經濟實惠。
呢間粥舖好鬼窩心，唔止推出放閃粥餐，仲照顧到一班單身仔女，有個限定「很想獨自快樂餐」。其實啲嘢食就冇咩特別嘅，都係粥呀腸粉呀咁，但啲名就叫做「一個人的豬紅粥」、「單身萬歲碎牛粥」、「很堅強齋腸」咁，真係好很有正能量！Loop住「很堅強很堅強x10000」次咁食，肯肯定會過得很堅強㗎，係咪呀哈姆太郎？
文：Kar