喺上海、北京、成都有30幾間舖頭嘅桃園眷村，主打台灣眷村嘅風味小食，今日正式嚟到香港，開第40間分店喇！

餐廳有4大金剛坐陣：豆漿、油條、燒餅、飯糰。店內用嘅全部都係加拿大嘅非基因黃豆，並且喺廚房特設大豆房，浸豆洗豆磨豆兼隔渣，全部工序都喺舖頭做晒，保證新鮮。磨成豆漿後，舖頭仲會測試大豆濃度係咪達標先出街，好professional。

豆漿除咗有鹹甜兩款之外，仲有無糖($22)、紅棗豆漿($24)、及紅茶豆漿($24)。呷一口，大豆味的確好香濃，質地亦不太稀，係真豆「漿」。即使不加鹽糖，原味都好好飲。

另有呢杯由糯米、花生磨成嘅米漿($24)，微甜，有花生嘅輕微焦香，食落有啲似花生糊、合桃糊。

鹹食嘅豆腐花，香港不太常見，但卻係台灣數一數二嘅平民小食。呢碗鹹豆花($32)有蝦米、紫菜、老油條碎、酸菜、辣椒油等，好足料，豆花好滑溜，微辛嘅醬汁好開胃。

跟住一定要介紹舖頭最熱賣item——眷村油條($16)，唔好睇佢賣相好似平日嘅油炸鬼，食落嘅味道、口感完全唔同。油條無煙韌口感，反之仲好鬆脆，好似食牛角包一樣。要做到咁鬆脆，就必須等到收到客人柯打時先落鑊油炸，可見餐廳嘅細心。柯打油條仲會跟送一小碟醬油膏調味。

燒餅與油條做法相似，不過喺製作過程中添加一層油酥，令燒餅口感更鬆脆，仲有粒粒嘅白芝麻添！推介燒餅油條蛋($36)，鬆脆之餘，仲帶點蔥蛋的小清新。

想要飽肚啲，可以試下飯糰，飯糰有肉燥滷蛋飯糰($32)、肉鬆青瓜飯糰($34)、熏肉蔥蛋飯糰($34)及台式香腸蔥蛋飯糰($42) 4款選擇，開飯仔比較鍾意台式香腸蔥蛋飯糰，好有肉感嘅台式香腸，加埋酸菜、蔥蛋等配料，好豐富。店子講求做法細緻，即使係飯糰，都會等客人柯打先整，唔會預先做好放喺保溫櫃保溫，好貼心。

店子今日起開始試業，嚟緊仲有打算開多幾間分店添，呢啲少有嘅心機小店，點都要支持下！

桃園眷村
地址：旺角亞皆老街8號朗豪坊4A樓1號舖
電話：3583 4787
營業時間：（試業）11am-8pm

文：Joy