大埔嘅街坊相信都聽過呢間喺區內小有名氣嘅一鳴拉麵，最近餐廳喺隔離開咗一間同名丼飯店，主打足料丼飯，一共八款，六款刺身飯，兩款熟食，選用新鮮食材，重質不重量。全店裝潢以木系為主調，仲有個半開放式吧台，客人可以睇晒廚師製作過程 。

究極甲羅盛

招牌究極甲羅盛，淨係見到個飯已經好澎湃！選用松葉蟹及鱈場蟹，丼飯放上原隻蟹蓋、原條蟹腳及蟹鉗，蟹蒸熟後拆肉並撕成絲，滿滿咁鋪上飯。蟹蓋內放上蟹膏、蟹籽、鵪鶉 蛋及香蔥等，加入味噌帶出鮮味，蟹肉加上蟹膏，送飯真係一流啊。

豪快海膽盛

鍾意海膽嘅朋友唔可以錯過限定嘅豪快海膽盛～選用三種唔同產地嘅海膽，款款都新鮮鮮甜，仲有海膽嘅甘香，入口即溶，海膽迷必試！

北海五品盛

貪心想試多幾款唔同剌身嘅開飯仔囡，呢個北海五品盛就啱晒你，一共有五款刺身，三文魚、油甘魚、帶子、海膽及牡丹蝦，仲有飽滿三文魚籽，啖啖都係鮮甜嘅味道，性價比高～

灸燒牛肉丼

唔食生嘢嘅朋友，呢度都有熟丼飯揀㗎～選用安格斯牛肉，牛肉充滿油花，即場灸燒後更顯香口。再加入用青檸汁、洋蔥及蒜製成嘅秘製醬汁，味道又豐富啲。

一鳴丼食堂

地址: 大埔運頭街20-26號廣安大廈地下F舖

文、相、片: Yanica