呢間位於日本，被Diners Club International選為世界50佳餐廳嘅法國菜TIRPSE，開業後僅兩個月就獲得米芝蓮一星，成功創造最快摘星紀錄！而餐廳最近已進駐尖沙咀商場K11 MUSEA，想喺新一年食下好西嘅朋友去試試啦。
TIRPSE掉轉睇係ESPRIT一字，於法文意旨「隱藏的法國精神」，餐廳除咗主打日式法國菜，亦會選用世界各地嘅當造食材。香港店沿用東京TIRPSE團隊，餐廳由侍酒師大橋直譽開設，而餐點由年僅28歲嘅主廚清水雄太及甜品師堀内凜主理。
餐廳主理人侍酒師大橋直譽。
主廚清水雄太(右)及甜品師堀内凜。
裝潢都別出心裁，一邊係日式和室風，亦有仿以前歐洲東方列車風嘅獨立房，畀人感覺摩登又不失傳統。而且餐廳坐擁180度維港全海景，就咁食個「景」同裝修都抵返晒。
食物方面，唔好以為米芝蓮價錢就一定好驚嚇，晚市dinner set $1188/位，以尖沙咀海景、米芝蓮一星以及過江龍嚟講，價錢都幾合理。
開胃菜蟹肉批，係法國傳統批，內餡係鮮甜嘅蟹肉，不過仍可能根據時令轉做其他海鮮。
另一道開胃菜北海道海膽撻，加入mimolette芝士及亞枝竹，一入口感受到海膽濃濃嘅鮮甜味。
前菜法國石蠔，石蠔厚肉，經過60度慢煮，配上菠菜泥、抹茶粉及菠菜粉，味道又幾夾。
同樣係前菜北海道白子配法國黑松露，底層鋪上法國有名嘅薯蓉，中間係北海道白子，上屠就係法國黑松露，味道溫和清新。
第三道菜香煎金鯛魚，金鯛魚連埋魚鱗半煎炸，外皮香脆外仍能保留肉汁，而且魚肉都滑；至於醬汁係用鯛魚骨、蜆肉及柚子製成，味道清爽。
主菜法國珍珠雞，先煎香後低溫焗，而醬汁就係用雞嘅精華加紅酒製成嘅燒汁，微甜但唔會蓋過雞味。
最有驚喜係餐廳嘅甜品，Guinness Ice Cream配上穀物種子及白朱古力脆片，酒味香濃。
Kalamansi Mousse白朱古力包住法國吉仔及日本士多啤梨醬，酸酸甜甜恰到好處。
而呢個Mascarpone Cream，材料有蛋白、砂糖及柑桔皮，柑桔皮可以帶起成個甜品味道，配埋特有嘅美國檀香雪糕好Match！
地址: 尖沙咀梳士巴利道18號Victoria Dockside K11 Musea2樓219號舖
文: Yanica
相、片: Tom Li