尖沙咀呢間酒店嘅自助餐一向受歡迎，尤其是固定嘅榴槤甜品區，吸引一眾榴槤迷長期幫襯。由4月12日起，餐廳限時推出泰式皇室主題菜式，當中部分菜式更深得泰國皇室喜愛。

有別於一般嘅泰菜，今次餐廳推出嘅泰菜係正宗泰國皇室料理及泰北菜，好架勢！而負責烹調菜式嘅廚師Jack Pinkkang掌廚超過20年，曾經喺2013-2015年期間被獲選為泰國駐港總領事館及已故泰皇嘅大女兒烏汶叻公主嘅御用廚師。

首先介紹烏汶叻公主非常熱愛嘅雜菜海鮮脆杯，入面有海鮮、雞肉、粟米、蘿蔔等配料，加埋外層脆杯，層次好豐富，通常烏汶叻公主睇戲、睇表演時特別喜愛食呢款小食，一口bite-size，方便進食又唔會麻煩。

除咗雜菜海鮮脆杯，烏汶叻公主亦喜愛呢款泰式宮廷甜品──紅寶石，齋睇賣相紅寶石似乎幾煙煙韌韌，但食落卻好爽口，原來係以紅色糯米皮包裹馬蹄，難得口感咁清爽，再加埋海底椰、大樹菠蘿、椰奶、斑蘭、茉莉葉去煮成。

香脆蟹肉蛋包睇落好靚，外層以網蛋包着，內餡有蟹、雞、芫荽、蒜蓉、胡椒粉、洋蔥及自家磨花生。廚師將蛋漿放入唧袋，然後喺滾油上面唧入蛋漿，令蛋漿快速受熱而變成網蛋，呢個工序非常考廚師掌握嘅速度、力度。

泰式味濃嘅傳統酸辣椰汁雞湯，入面有雞肉、蘑菇、香料及其他配料，有少許冬蔭功嘅酸辣之餘，香茅味亦香。

配料多多嘅泰式浸石斑魚，廚師先將石斑魚炸起，再以酸咖喱湯、泰國白花、酸子等一同煮滾。湯汁分量比一般煮魚為多，師傅建議可跟泰國當地人食法，一邊食魚，一邊飲埋啲汁當湯水飲。石斑魚肉鮮甜亦幾吸湯，仲帶點微酸，食落幾開胃。

估唔到呢款清邁香腸亦有驚喜，香腸以豬肉、肉碎、泰國辣椒、辣薑、香茅、辣椒粉及檸檬葉做成。本來以為味道好似冬蔭功咁酸酸辣辣，點知味道都幾辛辣，但未至於辣得眼淚直飆，送飯一流。

大大隻嘅咖喱炒蟹用咗香而不辣嘅咖喱、三色椒等一同炒香，無論係蟹鉗、蟹腳都有好多蟹肉，肉質肥美又鮮甜，喜愛拆蟹嘅人一定要試。

酸子粉大蝦用泰式酸豆醬炒大蝦，味道酸甜，鮮味更為突出，而且蝦肉夠彈牙。

除咗限定泰國皇室菜式，仲有其他一向受歡迎嘅自助餐菜式，有蟹腳、龍蝦鉗、小龍蝦、青口、蝦及墨魚仔等冰凍海鮮，品嚐最原始嘅鮮美。

餐廳內嘅壽司吧可食到三文魚、吞拿魚、八爪魚等4-5款刺身及壽司。另有刺身丼，由三文魚、八爪魚、三文魚籽、玉子、青瓜、蟹籽、紫菜等而組成，分量細，啱晒各位樣樣想試啲嘅buffet迷。

另一邊，有原隻吊起嘅（左）烤鴨，廚師將逐片鴨肉做成北京烤鴨；又有（右）印度菜廚房嘅兩款印度烤餅。

榴槤迷必食嘅榴槤甜品區，有（左）炸榴槤，賣相好似炸響鈴咁，入面有榴槤雪糕，但口感好似冰火咁突出；（右）榴槤芝士蛋糕，口感綿密，而且榴槤味好重，yummy。

不嗜榴槤嘅甜品控又唔使擔心，除咗榴槤，甜品區亦有各款奶凍、cupcake、芝士蛋糕、朱古力、Movenpick雪糕等等，總有一款啱你心意嘅！

泰國皇家風味自助餐
供應期：4月12-26日
價錢：（星期一至五午餐）成人$368/位、小童$258/位；（星期一至四晚餐）成人$678/位、小童$498/位；（星期五至日晚餐）成人$708/位、小童$528/位；另設加一

The Market
地址: 尖沙咀科學館道17號唯港薈2樓

文：Joy