講到奶昔，好多人第一時間就會諗起個甜字，不過尖沙咀呢間新開嘅紐約風奶昔專門店應該可以打破一般人對milkshake嘅既定印象。店舖全部奶昔都係選用MÖVENPICK雪糕同新鮮牛奶製造，供應超過十幾款招牌奶昔及純素沙冰選擇。
店舖奶昔特別之處在於製作奶昔時堅持唔加入冰塊，因此奶昔唔會變淡，確保客人每飲一啖都係真正嘅奶昔；同時引入一部美國嚟嘅奶昔機，取代用一般攪拌機製作飲品，由於奶昔機無刀片，因此奶昔口感特別滑溜。另外為迎合而家香港人愈來愈注重健康，部份奶昔加入水果保持甜度，減少使用糖漿。
朱古力岩鹽焦糖奶昔
朱古力控當然要試試呢杯朱古力岩鹽焦糖奶昔，以MÖVENPICK新推出嘅朱古力岩鹽焦糖雪糕製造，除香濃朱古力味外，帶有淡淡嘅岩鹽焦糖香，味道幾有層次感。
曲奇焦糖奶昔
呢杯曲奇焦糖奶昔簡直係螞蟻人最愛～由意大利奶凍雪糕做底，配以朱古力曲奇及焦糖醬，食落有粒粒朱古力曲奇，口感豐富。
芒果奶昔、士多啤梨奶昔
想清爽啲可以試試水果系列。芒果奶昔選用雲呢嗱雪糕加上鮮芒果製作，上面加埋粒粒芒果肉，酸甜開胃而且有陣陣芒果香。而士多啤梨奶昔加咗士多啤梨雪糕、鮮士多啤梨及士多啤梨醬，灑上健康燕麥片，係少女打卡之選！
白雪公主沙冰
除招牌奶昔外，店內同時備有健康嘅沙冰選擇，畀唔飲牛奶或茹素嘅客人多一個選擇。白雪公主沙冰剔除牛奶作材料，特別起用腐竹及豆奶加強豆味。中間加入一層軟滑豆腐花，再加埋黃糖燕麥同杏仁片，女士們一定鍾意！
愛麗絲沙冰
混合多種莓類同伯爵茶，入口先感受到雜莓的酸味同埋薄荷葉香氣，再滲出淡淡甜味，最後會feel到淡淡回甘嘅茶香～
地址: 尖沙咀金巴利道58-60A號金碧閣地下D號舖
文、相、片: Yanica