雖然間間茶記都可以食到沙嗲牛麵，但真心唔係全部都有質素，而且要將一樣平凡普通嘅菜式，煮得好食又有特色都唔係容易！今期精選出8間人氣主打沙嗲牛嘅餐廳，就各自都有佢哋嘅過人之處喇！
沙嗲牛脆麵 牛牛
西貢新開港式茶餐廳，一開業已經因為沙嗲牛肉而聞名～佢哋嘅牛肉麵有啲似車仔麵嘅玩法，可以自選牛肉部位、麵底同醬汁，如牛肉、牛脷同牛面珠，麵底就有湯麵、撈麵同炸麵，好有新鮮感呀。沙嗲汁帶點甘甜同花生香氣，可以一試。
圖: ａｒ檸
沙嗲牛肉沾麵 煲仔榮記
慈雲山人氣茶記榮記茶餐室新開嘅副線，更係沙嗲牛肉麵關注組內嘅人氣推介。食物方面比較創新，除咗有招牌沙嗲牛煲仔麵，更推出新版沙嗲牛肉沾麵，好濃郁好杰身，每一啖麵都掛晒沙嗲汁呀。
圖: captaintam
傳說中的沙嗲牛 好好運快餐店
未食過呢間真係枉為沙嗲牛嘅fans啦！唔使講佢哋沙嗲牛麵好香濃，洋蔥味同花生味都幾突出，而且牛肉份量多，重口味人士必定鍾意。相反如果你口味較清淡就未必啱啦。
圖: 長沙灣老字號茶記 新華茶餐廳
區內人氣茶餐廳，雖然就咁睇落個麵平平無奇，但每一部分都做得唔錯～麵爽彈又夠香，牛肉亦鮮嫩有肉味，沙嗲味濃，湯底係用忌廉雞湯，好懷舊！
圖: EAS
長洲名物沙嗲牛米通 陳通記
講到長洲必食，其中一樣都係呢個沙嗲牛肉米通啦～佢個沙嗲湯底真係好香濃，秘製沙嗲醬汁加入幼細嘅花生碎，口感豐富。而牛肉軟腍又有牛味，米通則以米製成，口感煙韌少少，幾有特色。
圖: foodradars
特濃沙嗲汁 樂園
九龍城熟食中心嘅著名茶記，主打特濃沙嗲牛肉醬汁，牛肉麵嘅牛肉好入味，都有花生香氣，係略嫌牛肉唔夠軟腍。另外沙嗲牛肉西多士都好有創意，值得一試㗎。
圖: eat4forever
鹹淡適中 誠記
平時嘅沙嗲牛麵多數都以濃郁為招徠，而呢度湯底味道少有濃得嚟唔會過鹹，帶有花生香甜味，就算飲個湯都唔覺口渴。牛肉新鮮唔韌，好有牛肉味，出色！
圖: Kamu_bside
灣仔傳統茶記 金鳳茶餐廳
春園街屹立不倒嘅人氣茶餐廳，沙嗲牛肉麵同一般食到嘅唔同，醬汁顏色偏深，味道偏重，同埋較為甜少少，而麵係用頂好伊麵，食落質感會厚身少少。
圖: 
文: Yanica
編：Kar