返親鄉下都要去驚安の殿堂買零食買藥妝買手信……總之就有好多嘢都想買，好似平啲抵啲又多啲款嘛，係排隊要排耐少少囉。講個好消息你哋聽，繼尖沙咀開咗分店之外，荃灣上星期都開咗間喇，仲要比尖咀嗰間大兩倍，佔地超過2400平方米。

無論貨品種類同口味，都比尖咀多呀~日本零食、壽司刺身、肉類、水果、飲品及生活用品通通都有，仲有熟食區，行極都行唔完咁，即刻同大家精選十大必買必食嘅嘢食啦~

1. 日本和牛西冷扒

牛魔首選，大大塊，肉味香濃，現場仲有得即場試食添~ 開店優惠去到下年1月5日都係$99/100g呀！

2. 日本水果

多款日本水果，呢期就有青提子、蜜瓜、梨等等，重點係士多啤梨啊！大大粒，好香甜，仲有淡雪士多啤梨，都係$150盒。

3. 水果大福

除咗日本水果，以香甜水果製作嘅大福都好吸引，祝桃大福仲買一送一添~

4. Choya朱古力禮盒

嚟緊聖誕新年要送禮？可以考慮呢盒Choya朱古力禮盒呀，係得呢間舖先有得賣咋。以幾款唔同口味嘅梅酒製成朱古力，酒鬼實鍾意。

5. 關東煮

熱辣辣嘅關東煮，最啱而家凍凍地食。蘿蔔、魚蛋、日本年糕等等有成16款選擇。

6. 大阪燒

即場製作嘅大阪燒，行過好容易會被佢嘅香味吸引，仲可以隔住玻璃觀賞師傅嘅製作過程。

7. 各式丼飯

對打工一族嚟講，最方便當然係丼飯啦~ 仲要係用北海道米製作嘅添，鰻魚、炸豬扒、雞肉等，梗有款啱。

8. 蕃薯

每次行親Donki都總會有陣香噴噴嘅蕃薯味飄過，呢間都唔例外，除咗原條蕃薯外，仲有啲蜜糖蕃薯條。

9. 酒類

酒鬼行佢嘅酒區就最開心，呢間大間咁多，酒款都特別多。好似日本果酒咁，呢度比尖沙咀都多好多款呀，玉露抹茶Asahi亦係當店限定。除咗各款吟釀、清酒、果酒等，荃灣店仲有埋常陸野貓頭鷹手工啤酒賣呢~

10. 財寶水

日本通實識啦~ 嚟自九州鹿兒島櫻島火山地下抽取出嚟嘅鹼性溫泉水，喺日本大受歡迎㗎。順滑甘甜，就咁飲用定係拎嚟煲湯煮飯沖咖啡都一樣得。

嚟緊仲會有個food court添呀，拉麵、和牛丼、八爪魚燒等等都會有得食，等多陣啦，暫定下年2月會開到嘅。暫時就去排住隊掃下貨先啦~~

驚安の殿堂荃灣店
地址：香港新界荃灣區大河道100號海之戀商場2樓

文、相、片：Kar