武漢肺炎持續肆虐，條街都靜咗、少咗好多人，但日日三餐屈喺屋企食麵包食杯麵公仔麵都唔係長遠之計。想出街食飯嘅話，揀啲做足安全措施嘅餐廳就安心啲啦。事實上香港有唔少餐廳為咗保障員工同客人嘅健康同安全，都推出咗唔少特別嘅抗炎措施。
捐口罩 請食飯 My Boat
眼見香港人個個都為咗搶口罩而瘋狂，最慘係見到老友記同基層巿民搶唔到！呢間餐廳實在唔忍心，於是發起「你捐口罩，我請食飯！」嘅行動，由即日起，捐5個口罩以上或消毒用品嘅話，可獲免費小食一客 (晚巿時段)；而捐一盒口罩嘅更可獲一份免費套餐！ 至於收集到嘅所有物資，餐廳都會交去城寨，由佢哋再轉發畀有需要嘅人。另外餐廳亦做足一系列衛生措施，包括高溫消毒餐具、廚具、每日至少消毒兩次餐檯同餐櫈、提供酒精搓手液等等。
餐廳位於觀塘，以海洋為主題，鍾意鰻魚飯嘅朋友不妨試下呢度嘅手勢，原條鰻魚上，比較特別嘅係炒飯底呢，好香口！
免費派口罩 漁一海鮮火鍋料理 
圖﹕SAXXYRUBY、漁一海鮮火鍋料理Facebook專頁
唔少香港人為咗買口罩，而要冒著寒風通宵排隊，令人非常心酸。呢間餐廳就不計成本，準備咗500個口罩，希望可以分畀有需要嘅人！口罩派晒，但餐廳仲有提供消毒手液畀食客使用，餐前餐後都搓乾淨手先。
介紹返，呢間火鍋店位於尖沙咀，淨係湯底都有成18款選擇，好似醉雞鍋呀椰子蟹煲呀咁，各款海鮮同配料都好新鮮。
超高溫蒸氣消毒 Café Paradise
圖﹕tasteofsincere、Café Paradise Facebook專頁
為咗提供一個更安心嘅飲食環境畀客人，呢間餐廳嘅餐具都經過超高溫嘅蒸氣消毒，務求令餐具更衛生咁話！如果客人自己準備餐具，從個人做好防疫措施嘅話，餐廳仲會送$5折扣添~ 同時體溫過高、身體不適嘅朋友都未必可以入場用餐。
香脆豬手係佢哋嘅招牌，皮脆肉嫩，去到記得要試呢。
定時量體溫 安安燒
圖﹕Yummy Fooder、安安燒Facebook專頁
呢間餐廳為確保每位員工都健健康康，會定時為員工量體溫，而且亦會要求客人量體溫。洗手間每個鐘都會用消毒液清潔一次，同時設有消毒噴霧，務求唔會殘留任何病毒。餐廳仲非常貼心，提供消毒液機、消毒濕紙巾畀客人搓手消毒，每枱仲會有公筷等公用餐具添，而喺抗疫期間，餐具亦暫時換晒用即棄餐具！
餐廳主力提供串燒，當中以蒜蓉燒扇貝、燒茄子、燒韮菜等最受歡迎，芝士控必食三重芝士撈丁呢，夠晒濃呀！
免費派漂白水 荳子
現時任何清潔用品嘅供應都相當緊張，無論係消毒洗手液，定係漂白水都係。而呢間餐廳就非常有愛，佢哋五間分店喺呢幾日都免費派漂白水，街坊只要自備器皿，就可以限取500ml漂白水，令唔夠物資嘅街坊都可以暫時放心下啦。
平時人氣都好高嘅呢間cafe，畀人一種悠閒嘅感覺，去到叫杯3D拉花咖啡再加多份甜品，都可以令人暫且放鬆。
幫手買消毒液 Amitie Kitchen
呢間意大利餐廳眼見香港嘅物資愈嚟愈緊絀，唔少人都非常擔心，所以主動為大家網購消毒搓手液，雖然數量唔多，但幫得幾多得幾多嘛，老闆亦繼續努力再搜尋中。
呢間西餐廳嘅蒲燒特長鰻魚流心意大利飯，長過隻手掌嘅鰻魚底下，仲有隻流心蛋呢，雙眼要發光了！
另外，仲有多間同香港人齊上齊落，同心抗炎嘅餐廳，例如：
香港島﹕
都爹利會館、Commissary、Avengers Kitchen & Bar、火鍋撚．典華、火鍋撚．典藝、貘記、活一鮮、皇后飯店、Ham & Sherry、Louise、Mak Mak、MONO、奧卑利、Kaum @ Potato Head Hong Kong、Happy Paradise、粥粉麵飯、掌門精釀啤酒
新界﹕
都爹利會館、吉壹野、慧食貓、潮食閣、牛県、豚道樂 Butadouraku、Relax Coffee 、荳子(將軍澳)、荳子(沙田)、荳子 (大埔)、荳子 (馬鞍山)、光榮冰室
九龍﹕
真．秘鍋、豚道樂 Butadouraku、甜記餃子、青花亭、Plato Cafe Bistro、走肉蔬食研究所、膳心小館、六両三、安安燒、尚上下夏 - 養生雞煲火鍋、WOFT、火鍋撚、獨 ‧ 火鍋撚、楚撚記大排檔、URBAN CAFÉ、荳子 (九龍灣)、掌門精釀啤酒、光榮冰室(旺角)、光榮冰室(九龍灣)、光榮冰室(尖沙咀)、大渣哥茶記 、龍門冰室
按此 查看更多支持防疫餐廳名單
文：Kiko
編：Kar
