食過英國靚仔廚神Jamie Oliver嘅Jamie’s Italian，一定要試埋新餐廳Jamie’s Deli。新店現已登陸尖沙咀海港城，係繼英國、挪威、德國及法國嘅第五間分店，而且仲係亞洲區首間！Jamie Oliver一向提倡健康飲食，呢間輕食快餐店更加切合均衡營養理念，主打新鮮沙律、三文治、薄餅等意式食品，可以外賣及堂食，既方便又快捷。
餐廳係Jamie’s Italian店中店，只於早上至傍晚營業，以自助形式用餐。食物款式及recipe與外國分店類近，但用料同做法都有少少分別，食材大部分都係外國入口，如澳洲農場走地雞及肉類，某啲蔬菜就係本地新鮮農場出產。餐廳有一套嚴格系統，要清楚食品來源先通過審批可以採用。
7至8款沙律全為素食，可以散叫，但套餐抵食好多，$68可以揀3款沙律，$78四款。最出名係重量級健康沙律，同上多種superfood包括黑米、藜麥及扁豆三款穀類，加埋西蘭花、紅菜頭、蕃薯及火箭菜等多款蔬菜，只簡單以橄欖油及雪莉醋調味，相當清新。而最受食客歡迎嘅就係羽衣甘藍凱撒沙律，就有炸乾葱、炸雞心豆、麵包粒等，鯷魚沙律醬輕怡，仍然可以食到蔬菜原味。
其他熱盤就有兩款薄餅，亦有招牌Gennaro肉丸、西西里烤龍脷、檸檬刁草焗三文魚及青咖喱雞等約4至5款，$88可拼兩款沙律。薄餅做法同Jamie’s Italian唔同，用上厚身意式香草包focaccia，非常香口，有傳統瑪格烈特及野菌兩款，亦會不時轉口味。肉丸選用英國免治豬肉，再加入辣椒、芝士，配上蒜蓉香草蕃茄醬，口感紮實有肉香，同三文魚一樣都依足Jamie食譜製作。
想飲可樂？唔好意思，呢度冇得賣！可以選擇冇加糖新鮮即打smoothies，好似以香蕉、菠菜同蘋果打成嘅綠野仙蹤，奇異果、燕麥及香蕉炮製晨光第一昔，總共有六款俾你揀，每杯$45。
地址：尖沙咀廣東道17號海港城海洋中心4樓412號舖
文、相、片：Perrins