坊間有唔少串燒專門店，主打烤鳥又真係用炭燒嘅其實唔多，銅鑼灣最近就新開一間日式居酒屋，挑選本地三黃雞同嘉美雞，供應唔同部位雞肉同內臟串燒，而且用備長炭以高溫炭燒鎖住食材水分，高質得嚟價錢又合理！
 

炭火地雞位於銅鑼灣登龍街，特別選用日本備長炭即點即燒，皆因燒嘅時候可以去到700度高溫，火候平均而且耐燒，最特別嘅就係燒出嚟嘅串燒有種獨特嘅炭烤香味，係電爐或者其他燒烤方法做唔到嘅。
 

叫得燒鳥專門店當然係主打雞肉串燒，以本地新鮮三黃雞同嘉美雞為主，前者肥美有油香，後者肉嫩有雞味。串燒會放喺呢個方碟，而碟上有柚子胡椒、一味唐辛子粉、日本黃芥末、檸檬同青檸畀客人按喜好自己添加調味。
 

雞心元（$39）

雞心元即係雞心上面嘅血管，肉質爽口滑嫩，本身就無乜內臟腥味，師傅又特別加埋蔥一齊燒嚟辟腥，平時怕食內臟嘅朋友都可以試下。
 

雞皮（$34）

雞皮加咗自家調配醬汁增加甜味，仲襯托出雞油脂香。食落兼具香脆同爽口，一啲都唔油膩！
 

（左）雞腿（$39）、（右）雞軟骨（$34）

雞腿肉燒至外皮香脆，肉厚彈牙，食得出師傅火候掌握得好，先可以Keep住肉汁。雞軟骨一聞就聞到好重雞油香，口感爽脆有咬口。
 

（左）雞頸（$36）、（右）雞肝（$39）

雞頸肉質爽口，彈牙之餘又唔韌。雞肝口感軟棉Creamy，香氣濃郁。
 

（左）雞腎（$34）、（右）雞心（$39）

雞腎非常鮮嫩爽脆，有肉汁而且完全唔腥。雞心肉質比較結實，配搭蔥花辟味易入口。
 

（左）厚燒和牛崩沙腩（$88）、（右）牛舌（$66）

雞肉之外亦有燒牛肉同豚肉，厚燒和牛崩沙腩係汁燒，自家製醬汁濃郁香甜，可以增加炭燒香味，同時唔會蓋過和牛香氣。崩沙腩肉質爽滑，加上燒過嘅洋蔥食落好滿足。厚切牛舌就夠晒爽口軟嫩，簡單調味就可以帶起肉香。
 

炭燒鱔玉子丼（$128）

用新鮮白鱔配搭自家醬汁做炭燒，味道香甜帶淡淡炭香，肉厚肥美。建議食飯係連埋日本生雞蛋、紫菜等配料一齊撈勻食，鮮味十足。配埋碗濃香雞湯，係餐廳每日用雞殼等材料熬製而成，味道清甜帶少少鹹香。
 

 

甘口唐揚炸雞翼（$48）

炭燒菜式之外，呢個甘口唐揚炸雞翼都係必點！用新鮮雞全翼炸至金黃香脆後再浸秘製醬汁。估唔到炸皮Keep到香脆口感，同時又食到醬汁甜甜哋又鹹鹹哋嘅味道，加上嫩滑嘅雞肉，夠晒惹味送酒一流。
 

煙燻雞火腿他他（$88）

由日本真空直送可生食嘅雞火腿，配搭生蛋黃、蘿蔔苗、子薑絲等，蛋黃可以令肉質柔軟雞火腿嘅食落更滑溜，其他配料就係增添辛辣味道。食法係撈勻之後用紫菜包嚟食，感覺幾特別。
 

雞肝醬（$88）

用新鮮雞肝加香草製作軟綿柔滑嘅雞肝醬，再喺表面撒上花生碎增加咬口。搽喺法包上面食落有好濃嘅雞肝味，仲有花生香，而且同樣一啲都無血腥味。
 

薯仔沙律（$68）

亮點在於上面嘅溏心蛋，濃稠嘅蛋黃撈埋沙律一齊食，味道更香濃。而且食到蟹籽一粒粒嘅咬口。
 

餐廳亦有供應多款日本清酒

炭火地雞
地址：銅鑼灣登龍街28號永光中心25樓

文、相：Cathy