好多人對中菜嘅印象就係濃味同油膩，所以對於出街食中菜都避之則吉。其實只要揀啱餐廳，出街食中菜都可以好健康。就好似以下三間中菜餐廳咁，都有為顧客提供少鹽少糖嘅菜式。雖然少鹽少糖，味道都一樣咁出色！
龍皇酒家
龍皇酒家菜式由行政總裁黃永幟主理，餐廳大部分菜式都實行健康理念，少鹽少糖，希望食客食到食材本身嘅味道。
米湯浸海斑球
呢味菜主要係食番魚嘅鮮味，用米湯浸魚比平時落少大約七成鹽，而且海斑本身帶有海水鹹味，加入瑤柱提鮮，食到鮮味外仲有瑤柱嘅甜味。烹調時師傅加入蛋白同生粉水會令魚肉更加滑添。
八綿炒金玉參
比起其他海參，金玉參嘅骨膠原特別豐富，而且呢種骨膠原人體會更易吸收，食完真係變靚啲～炒嘅時候加入蓮藕片、翠玉瓜、蜜豆、百合、雲耳、白果等材料，雖然呢道菜鹽分減少咗五成，但因為蓮藕片同蜜豆等材料本身都帶有甜味，海參吸收埋其他材料嘅味道，食落一樣咁惹味。
蒜蓉貴妃蚌蒸五穀米
選用韓國貴妃蚌，肉厚又鮮美。而五穀米高纖維之餘糖份少，係健康之選！蒸嘅時候蒜香同海鮮嘅鮮味會滲晒落五穀米度，每一啖飯嘅味道都好香。
全線分店：https://www.openrice.com/zh/hongkong/restaurants?chainId=10000154
阿一海景飯店
阿一海景飯店今次嘅少鹽少糖菜式由行政總廚梁兆明師傅主理，佢話如何做到菜式少鹽少糖之餘又夠味呢？「湯」就係靈魂所在。餐廳所有菜式都唔會落太多調味，改用自家熬製嘅雞湯及上湯去浸。至於金華火腿汁亦都係好重要嘅調味料，師傅亦話靚嘅金華火腿鹽份唔會太多，所以大家唔使擔心呢個問題啦～
鮑汁原隻澳洲鮮鮑魚
煮鮑魚嘅方式係唔用油同鹽，只用少量蠔油、糖、雞湯及金華火腿汁，所以除咗食到鮑魚嘅鮮味，仲帶有微微的海味獨特的香味。
龍馬精神 (豉椒馬蹄炒原隻龍蝦)
龍蝦選用乳龍蝦，肉質嫩滑較鮮甜。然後加入清甜嘅馬蹄同少量豆豉翻炒。呢味菜完全係無鹽無糖，只係加咗少量蠔油同上湯調味，咁先食得返龍蝦鮮味嘛。
招牌砂鍋炒飯
一呈上枱，已經聞到陣陣炒飯嘅香氣。材料包括海中蝦、瑤柱及蜜汁叉燒，將味道全帶入炒飯中。炒飯粒粒分明，因為用砂鍋嘅關係，食到尾都仲係熱辣辣。
地址：尖沙咀彌敦道63號iSQUARE國際廣場29樓
電話：23280983
逸東軒
逸東軒菜式由行政總廚譚棟主理，師傅話餐廳大部份菜式都實行少鹽少糖理念。
鮮沙薑陳皮生煎雞
呢道鮮沙薑陳皮生煎雞係餐廳招牌菜，調味料只係用上少量醬油及糖花醃製，再加上沙薑及十年新會陳皮。將清遠走地雞去皮後煎香，雞味濃之餘，仲帶有濃郁沙薑味及陳皮香。
三味弄豆腐
三味弄豆腐包括香蔥凍豆腐配鹹蛋黃、香煎豆腐配泰式辣醬及滷水炸豆腐。三個味道都無落鹽，鹹蛋黃凍豆腐清淡中帶微微的鹹味；而泰式辣醬同滷水份量都比以往少咗鹹味。
魚湯珍珠菇浸有機水耕菜
魚湯用上鯪魚肉及老雞熬製兩小時，又濃又鮮。水耕菜清甜爽口，再吸埋濃濃魚湯味，夠晒鮮甜。
地址：佐敦彌敦道380號香港逸東酒店B2樓層
電話：27101093
* 資料由客戶提供
