「好多朋友都問我點解會喺呢個時候開咗一間餐廳出嚟，好多人都知道開飲食係好困難，我而家好深切咁感受到。 」本身係香港職業籃球員，三分球神射手嘅劉子禮，最近喺九龍灣開咗間泰國菜餐廳，仲推出2.5小時嘅泰式小食任食放題！

劉子禮做咗運動員接近11年，去過好多唔同地方比賽，而泰國嘢係佢好深刻好鍾意嘅菜式，佢表示自己特別鍾意食芒果糯米飯，喜歡質感黏黏嘅感覺。佢更試過同朋友喺短短幾日trip期間夾埋食咗成23碟糯米飯！所以開咗呢間泰菜餐廳時，子禮亦希望自己嘅餐廳可以有啲有特色嘅芒果糯米飯，最後就出現咗呢個坊間少見嘅三色糯米飯，綠色係斑蘭葉，紫色係蝶豆花，普通嗰個就係白糯米。三款口感同樣黏糯煙韌，淋埋椰味香濃嘅椰漿味道唔錯。

至於放題，每日下午茶時段，$78就可以任食兩個半鐘嘅小食啦，9款小食包括串燒菠蘿、燒豬頸肉、香茅豬扒、香茅雞翼、泰式炸魚餅、炸蝦餅、炸春卷、泰式鳳爪沙律同埋自創泰式pizza包。全部都係由正宗泰國廚師炮製。

串燒菠蘿輕輕加鹽再燒，表層有微微焦香，咬落多汁，拮下一粒拮下一粒係會幾想encore嘅。

炸蝦餅同炸魚餅都有濃郁嘅香茅味，中間仲釀入咗唔同嘅香料添；泰式鳳爪沙律仲係無骨嘅添，方便進食，甜甜酸酸又帶微辣，愈食愈開胃。

香茅雞翼係原隻連埋雞翼尖咁上，大大隻好吸睛，啱晒鍾意吮骨嘅朋友。

Pizza包一個三層，中間夾住以紅酒炒香過嘅豬肉、蕃茄洋蔥等，再加埋熱溶嘅mozzarella芝士，麵包軟身，食落係幾香嘅，不過就幾飽肚，唔食得多。

 燒豬頸肉、香茅豬扒

 炸春卷

另外，本身每位客人都會免費送支大支裝嘅泰國勝獅啤酒，不過叫得呢個小食任食，雞翼豬扒炸魚餅咁樣樣都咁啱送酒，一支邊夠酒鬼飲吖？加$38就可以連啤酒都係無限任飲喇！

同場推介兩款唔包喺任食內，但同樣值得一試嘅單點小食：沾滿麵包糠嘅泰式炸蝦多士，同埋滿滿牛油蒜香嘅金磚包。

由運動員跳進飲食業，子禮不諱言自己係新手，仲要遇上疫症肆虐，佢當然都擔心餐廳嘅生意，但佢依然抱有樂觀嘅態度：「始終未來係冇人會知，我覺得大家都要支持落去，可能秉承返我運動員，我覺得好多嘢都要堅持，你唔堅持好多嘢你都唔知結果會係點，希望呢度會愈做愈好，甚至係香港會愈嚟愈好。香港人都要加油！」

泰式小食X泰國啤酒放題
供應時間：每日下午14:30 - 17:15

泰傳奇   
地址：九龍灣展貿徑1號E-Max 國際展貿中心2樓21-23號舖

文：Kar
相、片：Tom Li