香港一直都係東西文化嘅交匯點，自開埠以嚟洋人同華商之間嘅「買辦商人」(Compradore)就係呢種混雜文化嘅先驅。位於中環娛樂行新開嘅點心茶館就傳承當年「洋行買辦」時代嘅文化精神，以最優質嘅茶葉配以傳統手工點心，帶領大家再次體驗呢種「港式優雅」。香港人品一口茶或嚐一口點心同時，都能感受到當初最地道嘅文化滋味。

餐廳內嘅茶具及餐具都別有一番心思，大部都由擁有近百年歷史嘅香港老品牌「粵東磁廠」手繪所製。

香港傳統茶樓茶室已所餘無幾，大多數人都只將茶視作日常飲料，所以為咗令「茶」再次成為茶館內嘅主角，餐廳秉承當年買辦商人嚴選茶葉嘅傳統，特別 搜羅自中國各地優質茶葉。當中最頂級嘅茶葉就係大吉嶺紅茶始祖，產自福建武夷山嘅正山小種，餐廳重新命名為「Darjeeling Zero」，令喜愛品茶嘅客人都可以感受到紅茶鼻祖嘅滋味，味道香濃而不涸喉。

點心方面，由前富豪飯堂福臨門老師傅親自主理，招牌菜韭菜炸蟹盒係該飯堂名菜焗釀蟹蓋嘅變奏版。點心嘅難度在於韭菜與蟹肉嘅比例，以及油炸嘅溫度及時間控制。口感香脆及食得出蟹肉鮮味及韭菜香氣。

另外仲有坊間常見嘅鳳眼餃及蛋黃千層糕。鳳眼餃內餡改以帶子為主，味道清爽鮮味～

蛋黃千層糕因為工序繁複已經好少人做，因為需要逐層逐層製，再逐層逐層分開蒸，所以食嘅係一份心思。

餐廳亦秉承咗英國下午茶會嘅文化，特別設計咗一套九件嘅咸甜糕點。由蝦多士、黃橋燒餅及咖哩春卷三款鹹點開始，再到香甜嘅棋子餅、迷你紅綾酥及黃綾酥，最後則以豆沙芋棗、鳳凰單叢桂花糕及椰汁糕作結。

福和雍點心茶館

地址: 中環皇后大道中30號娛樂行2樓C及D號舖

文:Yanica 

相: Tom Li