要入天后食「好西」，可能唔少人都會先諗起大坑，但天后港鐵站附近嘅電氣道都係一條有唔少美食選擇嘅食街！同朋友嚟食西餐，得；同屋企人食中菜，得，同同事嚟食健康咖喱，得；自私食超抵壽司，亦得！
高CP值立食壽司 中村屋
外賣壽司絕對唔等於劣食，呢間壽司店就係快靚正嘅代表。快，有現成包好咗嘅件裝壽司方便外賣，唔介意企嘅就可以立食即叫即製嘅自選壽司；靚，壽司材料唔少都由日本築地直送，亦有季節限定魚生食材；正，價錢由$5到$18一件，刺身唔會太薄食得出鮮味。偶然條癮起想食新鮮壽司嘅話，呢度就係一個好選擇。
樓上高質西餐 KS Cafe
圖：胃食小王子
沿住電氣道行已經有唔少餐廳，能夠開喺樓上而Keep到一班人嚟支持，呢間西餐廳嘅質素當然有返咁上下。唔少人都會嗌返碟嘅牛油果海蝦釀燒烤菇係將蝦肉、牛油果加埋芝士放上啡菇上面烤焗，口感豐富味道輕怡。主菜就以Set裡面嘅香煎美國T骨牛扒配紅酒汁最抵食，唔單止分量大，扒肉軟嫩富肉味，醇香紅酒汁亦配搭得宜。
日式住家Feel小館 坐忘
雖然話辛苦搵來自在食，不過要自在又唔代表一定要大魚大肉嘅。呢間日式咖喱店有住家Feel得嚟仲標榜多野菜同無添加味精。招牌菜豬軟骨七小時煮名副其實炆至軟腍入味，啱哂鐘意骨膠原嘅女士。而十五種溫野菜沙律定食顏色豐富得嚟，煮過嘅野菜食得出原味而唔單調，配埋秘製醬汁，就算平時唔鐘意食菜嘅朋友仔都可以輕易KO一碟。
德州巨無霸漢堡 Texas Burger
喺天后呢區呢講，佢地嘅漢堡認第二嘅話應該無其他餐廳敢認第一。招牌德州燒烤漢堡用6安士重嘅煙薰牛肉嚟做漢堡扒，鬆軟多汁，加埋半溶芝士、煙肉、炸洋蔥圈，生菜等配料，層次豐富又邪惡。想食特別啲嘅話仲有煙燻鵝肝漢堡、燴豬絲漢堡、哥根蘇拿藍芝士漢堡等一樣分量十足嘅選擇。
中菜飯局好選擇 御名軒
圖：jimelaw
平時開飯仔比較少介紹酒樓，但呢間酒樓的確唔普通，無論係春夏啱食嘅各式小菜，定係秋冬天暖胃必食嘅羊腩煲都相當有水準，正宗四季合宜。連燒味、炒飯等都見到師傅功架。不過最多人嚟食嘅，就係大閘蟹。唔單止價錢相宜而且無將貨就價，差唔多隻隻蟹都爆膏，豐膄美味，可惜而家已經過咗當造期，嗚嗚嗚......
百變雞蛋仔配Gelato Ice Puff
香港經典街頭小食雞蛋仔近年多咗唔同口味，呢間都唔例外，有齊甜鹹款仲可以配Gelato雪糕。甜嘅雞蛋仔口味推介比利時70%黑朱古力，朱古力味道濃郁之餘又甜而不膩，粒粒鬆軟又食得出蛋香。鹹嘅就可以一試意大利黑松露雞蛋仔，黑松露香味濃郁。而且Gelato口味選擇都唔少又有特色，例如麥精同阿拉伯咖啡等，配搭夠多可以再Encore！
創意特色居酒屋 八十八居酒屋
圖：heidima
日本人放工鐘意去居酒屋食下「好西」Relax下，喺香港一樣都有氣氛同食物質素都唔錯嘅居酒屋，例如呢間就以創意加分。招牌八十八拖羅金蛋顧名思義，係炸到金黃酥脆嘅雞蛋上面放上拖羅蓉，食嘅時候記得點埋蜜糖芥末醬，畫龍點睛。另外松露醬油燒帶子亦係必試，新鮮帶子刺身配上松露醬油，夾得嚟又唔會搶走對方鮮味。
轉角Cafe食窩夫 Artisan Cafe
位於轉彎角嘅呢間Cafe雖然地方唔算大，但有種悠閒輕鬆嘅感覺，得閒嚟Hea下就啱哂。佢地嘅咖啡有水準，不過開飯仔最推介嘅係佢地嘅窩夫，點一份窩夫全日早餐，滑溜嘅炒蛋、炒到香噴噴嘅蘑菇、煎脆腸同新鮮沙律同外脆內嫩嘅窩夫係Perfect Match。想食甜嘅亦可以嗌綠茶紅豆或者芒果口味。
開飯編輯推介：
1. 【專訪】「我喜歡堅持 我只得堅持」 新入圍米芝蓮法式泡芙店谷底反彈
3. 10月份好評餐廳十強
熱門文章推介：
3. 精選芋圓甜品舖PK戰
隨時接收最新資訊
讚好OpenRice專頁！