一學就識，教你點分正宗、澳門葡國菜

平時過大海食得葡國菜多，但你又知唔知葡國菜又分兩種：正宗葡菜同澳門葡國菜？原來，當日葡國人登陸澳門之後，個個都好掛著家鄉菜，但無奈受制於當時落後嘅保鮮技術，冇辦法用番葡萄牙原料煮食，所以佢哋以本地食材作為替代品，再結合亞洲區不同國家嘅烹調方式，創造出獨一無二嘅澳門葡國菜！呢個中西合壁嘅澳門葡國菜無論喺菜式、佐料、味道同飲食習慣方面，都同正宗葡國菜有好大分別，等開飯仔而家過你幾招，教你點分啦！

菜式

Photos by sammyho & mushroomb

東葡以肉類為主食，西葡盛產海鮮，所以葡國菜以肉類同海鮮為主。正宗葡國菜方面，有紅豆豬手、清菜湯、燴牛尾、馬加休等。而澳門葡國菜嘅招牌菜式就有非洲雞、葡國雞、炸馬介休魚球等，佢哋都係由旅居葡國人將中菜同葡菜結合，兼收並蓄創造而成嘅澳門獨有菜式，去到葡國同非洲都搵唔到，所以見到餐牌，你應該就識分正宗葡國菜同澳門葡國菜啦。

佐料

Photos by cmygermany

除咗蒜頭同鹹蝦之外，正宗葡國菜煮食時甚少加入其他醬料。澳門葡國菜就受本地飲食習慣影響，混合咗中式烹調手法。喺煮食時，經常會加入酒、醋、醬油、食油、生姜、蔥、蒜等佐料。除此之外，有時更會混入非洲、印度同東南亞辛香料，令菜式好有「異國風情」！好似招牌澳門葡國菜非洲雞咁，就加入咗蒜蓉、椰汁、花生、咖哩、香料燴焗。

味道

Photos by jeffayn

葡國人偏好鹹食，所以正宗葡國菜通常濃郁鹹重，其中最出名嘅就係「馬介休」，即係經大量海鹽醃製嘅鱈魚，佢等同韓國人嘅泡菜，非常受葡國人歡迎。然而，呢種鹹澀味道就唔太適合澳門人口味。所以，喺澳門葡國菜中，製作馬介休前都會用清水浸透魚肉，以褪去澀味。另外，正宗葡國菜不愛辛辣，但中國人就嗜辣。於是，一啲迎合當地人嘅菜式如咖哩蟹應運而生。

飲食習慣　

Photos by SMASHING PUMPKINS

葡國人嗜酒，佢哋有句說話：「葡葡酒是大地和太陽的兒子，振奮精神，啟發智慧。」對酒嘅喜愛可見一斑，所以佢哋用餐時一定會飲酒，總愛互相乾杯，以至酒水洒喺臺布度。咁熱情嘅西洋作風，喺澳門葡國菜餐廳就比較少見。

資料來源：澳門貿易投資促進局

文：段

隨時接收最新資訊
讚好OpenRice專頁！