減肥好辛苦？咁係因好多人唔識科學減肥。其實減肥係一項集認知行為學、心理學、營養學同生物學為一體嘅科學。

人，其實好複雜，好多減肥人士之所以減完又反彈，係因為唔了解人嘅心理同生理。

今日，我同大家分享3個科學減肥論，等你了解自己更多，繼而輕鬆減肥。

1. 睇到人哋食垃圾食物 你會更易破戒

點解我哋睇到人哋食垃圾食物，你會更易破戒呢？因為我哋一旦發現人哋降低自律、違反規定嘅時候，我哋都會降低對自己嘅要求。特別係睇到比你肥嘅人食得好開心嘅時候，呢個心理現象好常見。

咁點算呢？教你一招，就係變身成健康使者，用呢種心態去面對。

即係點？就係當你睇到人哋食垃圾食物時，你個腦唔應該諗『自己食唔食得』，而係諗『個啲食物好唔健康，容易致肥，佢哋點解仲要食呢？我使唔使去勸下佢哋呢？作爲健康使者，我唔應該再食嗰啲咁唔健康嘅垃圾食物啦。』

當然唔係要你真係去勸人哋，因為人哋可能唔會理你，你只要係心入面咁諗就得啦，呢招對好多人嚟講，幾WORK。

2. SET過高目標有風險 快接近時最危險

好多人習慣SET過高嘅目標，例如一個月減20磅，咁做的確可以起到一定嘅激勵作用，但係大多數情況下，風險都同時增加。

心理學上有一個效應叫做 Goal-Gradient Effect，中文係目標趨近效應，即係我哋越係接近某個目標，越係想要不惜一切代價去完成佢。

但係，呢個時候嘅意志力通常非常薄弱，令你好易喺某一個點放棄，如果你喺達到目標之前崩潰左，你會開始怪自己，變得無自信，甚至憎自己。

所以，唔好將目標SET得太高。與其SET大目標，不如SET一啲清晰嘅小目標。例如每天加一份蔬菜俾自己，每日少飲一杯含糖飲料等等。

比起大目標，呢啲小目標可以令你更有成就感，更容易堅持，對自己更有自信。

3. 判斷真假餓 避免食多左

無可否認，我哋好多時食野，唔係因為肚餓，而係因為好多其他複雜嘅因素，例如心理、情緒、壓力、習慣同無聊等等，呢啲都可能令你想食野。

所以，判斷自己係咪真係餓咗，真係唔易。。。

不過，近排發現一個好方法，大家可以參考下。

心理學家古德森發現，如果你覺得肚餓，想開雪櫃，搵嘢食時，可以同自己做一個心理測試，去判斷係咪真係餓咗。

你可以問下自己：「係咪可以食一個蘋果？」，如果答案係「YES」，咁就可能真係餓咗，如果答案係「NO」，咁你可能唔係真餓，呢個時候，你大可以試下飲一杯水。

事實上，肚餓同口渴係生理上嘅反應好似：肚餓表現為感到虛弱，變得暴躁，個肚咕咕叫；口渴：變得虛弱，變得暴躁，口乾。

睇到未？肚餓同口渴嘅生理狀態真係好近。

另外，處理肚餓同口渴感覺嘅大腦區域係同一個位，所以腦部要分辨2種相似嘅信號，就可能出現混淆，導致人體誤認口渴嘅訊號為肚餓訊息，搞到你食多咗野。

Like營養師Sharon Chan的fb專頁(點擊)

※上述內容純屬作者個人意見，不代表本網立場。※