平時要淥3分鐘先食得嘅麵，而家一開就食到嗰種味道，仲要係脆卜卜，唔使驚話唔小心淥得太耐，腍咗，冇咁好食呢件事再發生。講咗咁耐，呢3種麵食系嘅薯片，究竟係咩味？同本身隻麵有幾似先？是咪真係嗒得到嗰種味先？
撈麵系 Chitato營多撈麵味薯片
3款薯片嚟講，呢款營多撈麵味係最新出嘅！便利店9蚊就買到一包，一打開已經聞到好大陣嘅Indomie味！
薯片種類：厚切波浪形
味道：香濃撈麵味，係嗰種好熟悉嘅味道。不過愈食愈鹹，同埋都有啲辣。平時食Indomie唔食辣嘅朋友仔，鼓起勇氣食一塊啦。
像真度：*****
公仔麵系 出前一丁麻油味薯片
呢隻味其實都出咗好幾年喇，應該都有好多朋友仔試過。作為第一代嘅麵食系薯片，嗯，我只可以話長江後浪推前浪啦。
薯片種類：V-cut厚切薯片
味道：可能期望太大，一啖食落去其實唔多食到麻油味，公仔麵嘅味都唔重。
像真度：**
杯麵系 潮池屋合味道香辣海味薯片
合味道杯麵本身已經愈出愈多隻味，估唔到佢連薯片嘅巿場都一樣咁進取，有香辣海鮮味、黑胡椒蟹味同冬蔭功味。今次我哋就揀咗最多人鍾意食嘅香辣海鮮味嚟試下。
薯片種類：V-cut厚切薯片
味道：講真，一食的確係好杯麵嘅味道，但唔睇包裝又未必食得出係「香辣海鮮」味，不過勝在辣味夠香夠辣，呢隻味嘅粉絲應該都會幾鍾意食，識食一定係食到最後吮埋啲粉！
像真度：****
唔知遲下會唔會有埋炒麵王呀、媽咪麵呀之類嘅味嘅薯片嘅？搵人跟進下吖~
文：Kar
隨時接收最新資訊
讚好OpenRice專頁！