最優秀開飯小食店 (2016), 最優秀深水埗區開飯熱店 (2016)
香滑多醬豬腸粉 合益泰小食
深水埗呢區特別多平靚正美食，其中一個代表一定係呢度嘅豬腸粉 ！自家古法炮製嘅手拉蒸豬腸粉米香十足，香、白、滑、濃、彈五合一，難怪米芝蓮都將佢地列入街頭小食推薦。
而且豬腸粉嘅精髓係混醬（好似係），姐姐會先落好豉油、香濃芝麻醬同少少邪惡但超香嘅豬油！枱上面嘅甜醬、辣醬同烘過嘅芝麻粒就自己選擇加幾多都得。除咗腸粉，豬皮蘿蔔同綿滑嘅粥都係實惠又好味嘅推介。
圖：Bayvan、lalalee8888
最優秀荃灣/葵青區開飯熱店 (2016)
相機食先悠閒Cafe 荳子
想搵間Cafe食下輕食Hea返陣，一定要去連鎖咖啡店或者旺區嘅樓上Cafe？唔一定，近幾年多咗唔少有水準嘅Cafe開喺地區當中，荃灣呢間就係好例子。
Cafe有漢堡意粉等輕食，但最出色嘅都係甜品。抹茶流心芝士撻連埋抹茶雪糕同貝殼蛋糕蛋糕，一次過滿足抹茶控三個願望，上枱時盒裡面仲有乾冰，噴哂白煙咁啱哂相機食先。拿破崙蛋糕同窩夫都唔錯，最後提埋大家，非繁忙時間可以問下有無3D拉花咖啡㗎！
圖：vampirecat、lalahoi
最優秀開飯咖啡茶室 (2016)
唔係港女都愛食 Lady M
嚟自紐約嘅精品蛋糕店，招牌千層蛋糕喺當地都有唔少明星Fans，一嚟到香港就吸引咗唔少愛甜嘅女士排長龍一試，所以亦有「港女餅」之稱。
千層蛋糕由大概20層薄身班戟製成，每層中間再加忌廉，整個過程都係人手製作。蛋糕嘅班戟充滿蛋香，忌廉幼滑輕盈，無論用刀定用叉都可以輕易切開，唔會天一半地一半。而且口味又多，仲會喺特別節日推出特別蛋糕，就算唔係港女都會為之瘋狂。
圖：noel.ho.1297
全城人氣「抹茶」開飯熱店 (2016), 最優秀開飯甜品店 (2016), 最優秀尖沙咀區開飯熱店 (2016)
抹茶三冠王 中村藤吉
如果你身邊有唔少「吃貨」朋友嘅話，舊年打開Instagram同Facebook應該都會比唔同綠色嘅抹茶甜品大肆「洗版」。開啟呢股抹茶風潮嘅原因之一就係中村藤吉佢嘅出現！
嚟自日本京都嘅抹茶老字號，未開店已經引嚟唔少抹茶控注意，一開門更係大排長龍。全部抹茶甜品都有濃郁抹茶甘香，就睇你鐘意點樣配搭。心多多想咩都試啲嘅可以點京之精選或者抹茶芭菲，鐘意冰涼滑溜感覺嘅就要生茶啫喱，最後唔怕早起排隊嘅就可以一試每日限定供應嘅抹茶蕨餅啦！
圖：DessertMonster6、loveatcc
全城人氣「卡通主題」開飯熱店 (2016)
優質咖啡加分數 查理布朗咖啡專門店
就咁講Charlie Brown呢個名或者未必可以第一時間諗起，但講埋佢隻狗仔Snoopy應該就會有印象！呢間Cafe以花生漫畫人物做主題，唔單止影相位多，出品亦有酒店級水準！
輕食小食飲品蛋糕一應俱全，輕食方面以史諾比飯配肉醬最吸睛，因為真係有成隻3D Snoopy...飯喺度。而飲品方面就以咖啡為主，唔少食家都話咖啡水準出乎意料地唔錯，甚至拍得上酒店級。最後甜品環節可以點一件有公仔大頭嘅蛋糕，為一餐畫上得意又甜蜜嘅句號。
圖：Zoeylaw1234、肚餓上班族
全城人氣「抹茶」開飯熱店 (2016)
食軟雪糕雪糕雪糕 Sweets House Cha Cha
喺香港叫得自己做抹茶控嘅應該都聽過佢嘅大名，係日本「菓匠茶屋」旗下嘅副線，專賣軟雪糕、泡芙同大判燒。
佢地抹茶軟雪糕雖然唔係全城最濃味，不過軟雪糕用北海道3.6牛奶製造，Rich得嚟口感特別軟滑。抹茶控食返支抹茶止下癮得，其他朋友試支牛奶抹茶兩溝亦得，得咗。另外泡芙亦有唔少Fans，抹茶餡幼滑帶少少回甘，泡芙皮又夠脆。要飽肚嘅就當然要食埋個大判燒啦。
圖：lawmt、叮叮w
想知全部得獎結果及頒獎禮盛況，即上：http://bit.ly/1Ogj2Jm
隨時接收最新資訊
讚好OpenRice專頁！