最優秀開飯意大利菜餐廳 (2016)
悠閒Sunday Brunch Assaggio Trattoria Italiana
放假瞓到自然醒是常識吧？醒咗再去食個豐富嘅Brunch，咁至係週末嘅Good Morning！呢間位於灣仔藝術中心嘅意大利餐廳環境輕鬆舒適，伴住玻璃窗出面嘅維港景特別有Feel。
最多會員喺食評讃嘅就係佢地星期日嘅半自助Brunch，10款任食頭盤凍熱都有，主菜更有14款選擇。由侍應源源奉上，方便帶住小朋友嘅家長。餐廳À la carte嘅意粉同Pizza都係唔少食家嘅推薦。
圖：Yan~*
最優秀開飯廣東菜館 (2016)
飛甩老土趣致點心 唐宮小聚
唔少小朋友都未必肯坐定定乖乖地同屋企長輩一起嘆一盅兩件，不過嚟呢間中環新派廣東菜館應該就唔會發生以上問題，因為酒樓唔單止裝修摩登，連點心都各具特色！
松露香菇形色俱似，咬開裡面仲有香噴噴嘅松露香菇餡。玫瑰饅頭雖然無咁似，但特別加咗玫瑰花瓣，啱哂相機食先嘅新一代。難得點心造型精緻得意之餘，味道亦有相當水準，招待客人都絕不失禮。
圖：Air 桑
最優秀開飯咖啡茶室 (2016)
紫薯x韓風無得輸 Seoulmate Cafe
過去一年最Hit嘅除咗抹茶同芝士撻，紫薯甜品亦有唔少Fans，呢間西環嘅韓式Cafe就係例子之一。
亞朱媽紫薯年糕多士配雪糕用韓式煙韌年糕加味道自然香濃紫薯蓉，加埋多士點雪糕食真係可以甜品當正餐。Die Hard Fans仲可以嗌埋紫薯芝士蛋糕同熱紫薯拿鐵。而且韓風持續大熱，點一份賣相精緻又有層次嘅岩漿蛋拌飯配黑松露配煙三文魚，就食正埋韓風可以繼續放IG呃Like啦。
圖：豬屎忽、myfoodyssey
全城人氣「卡通主題」開飯熱店 (2016)
精緻Kitty優質西餐 Hello Kitty Secret Garden
卡通主題餐廳越開越多，但要Keep住人流，除咗影相位要多仲要維持食物質素，大坑呢間以Hello Kitty做主題嘅西餐廳就係其中一位代表。
餐廳一邊係輕食Cafe，另一邊係西餐私房菜，兩邊由餐具到嘢食全部都有Hello Kitty大頭或者招牌蝴蝶結出現，就算唔係Fans都忍唔住全部影一次！Cafe嘅蛋糕全部都相當精緻，而且咖啡質素唔錯之餘仲有Kitty拉花。而西餐就只有Set Dinner，勝在水準平均。
圖：_c.wai_l、Nia
最優秀中西區開飯熱店 (2016)
正宗台南風味小店 阿元來了
事先聲明，呢間小店比較適合一支公去。事關一放假就好多人會去排隊，想一班Friend坐低慢慢吹水有難度，因為繁忙時間用餐時間限30分鐘！
點解咁趕都咁多人排隊？因為呢度由一位鐘情香港熱鬧特色嘅台灣人開設，唔單止裝修非常有台灣特色，賣嘅食物亦係正宗台南夜市小食！魯肉飯脂香誘人，而且魯肉同飯嘅比例啱啱好，撈起嚟細細一碗但滿足度甚高。鹽酥雞同椒鹽魷魚酥都炸至金黃香脆，掛住台灣美食又唔得閒飛一轉嘅時候，咪嚟呢度一解相思之苦囉。
圖：Too Full For Food、jasmine_ho
最優秀東區開飯熱店 (2016)
平實溫暖手工湯圓 福元湯圓
去完咁多餐廳食盡好嘢食，不妨亦留少少胃口比呢間北角嘅港式糖水舖，最後嚟個Sweet Happy Ending。
店如其名，打正旗號賣中式湯圓，每粒湯圓都係人手搓成，皮薄餡靚。生磨芝麻餡落咗豬油，咬落有流沙效果，香滑到會令人暫時唔記得減肥呢兩個字。花生餡一樣真材實料，無芝麻餡咁滑，換嚟嘅係扎實嘅花生粒口感同香味。湯圓皮煙韌軟熟，薄得嚟又唔會容易漏餡，係最簡單但窩心嘅甜蜜。
圖：C U Later、bageladdiction
想知全部得獎結果及頒獎禮盛況，即上：http://bit.ly/1Ogj2Jm
隨時接收最新資訊
讚好OpenRice專頁！