【開飯熱店入圍名單巡禮】全城熱捧甜品店疏乎厘班戟芋圓刨冰爭崩頭

常問道人生有幾多個十年，OpenRice啱啱就有兩個。踏入開飯二十年，優秀開飯熱店2019以「歷久嚐新」做主題，擁抱經典、傳統老味道之餘，亦緊貼潮流，飽嚐新世代嘅美食。即刻睇下邊啲必試熱店入咗圍啦。

甜品可以話係女生嘅all time飛佛，開心要食，唔開心要食；同閨蜜要食，同honey又要食；而且空肚食又得，飽肚食都得。年中數埋都唔知食過幾多間甜品店咯，今年優秀開飯熱店大賞嘅入圍十強，又有冇你哋心水？記住投票呀！

鑊仔雪山熱香餅 Ocio

旺角呢間café嘅甜品，吸like度絕對滿分。首推「玫瓏蜜瓜雪山」，蜜瓜頂層放上餐廳特製，海綿質感嘅熱香餅，再上面就係雲呢嗱雪糕同蜜糖星星，一啖入面冷熱交融，有多重口感，蜜瓜好清甜，記得慢慢刨乾淨。另外，鑊仔雪山熱香餅同樣都係呢度嘅大熱甜品。

刨冰本身已經好吸引，呢間由北海道老闆開設嘅冰店仲要時不時就推出啲期間限定口味，款款都大大份、多多醬，好睇又好食。最受歡迎嘅長青款式當然就係抹茶味啦。呢度嘅刨冰口感好軟綿綿，入口即溶，抹茶仲有陣回甘添。

必食鬆軟厚pancake The Pantry

圖：sharoncychung、mingming7

見到差唔多每枱都會叫一客pancake，就知道pancake係呢度嘅名物，嚟到非試不可。厚pancake全部都係即叫即做，加入 Ricotta 芝士製作，入口瞬間就融化開，空氣感同濕潤度都適中，兼且有蛋香味。除咗原味外，另有tiramisu、綠茶同芒果等選擇。

煙韌手工芋圓康瑞甜品

深水埗長期人氣甜品店，由以前喺中醫館涼茶舖一個細細舖位搬到現址，難得水準依然。餐牌選擇唔多，不過就算有幾多都好，幾乎個個都係為咗特色仙草百配而嚟。粒粒芋圓由人手搓製，煙煙韌韌好有嚼口，芋頭、蕃薯味道亦夠香，配埋仙草、珍珠、薏米等材料，食完係會有份滿足感。

人氣日本過江龍幸福班戟

未開舖已經全城期待嘅日本過江龍pancake店，嚟到後當然日以繼夜又夜以繼日咁大排長龍。沿用優質食材，做出4cm厚、充滿空氣感嘅鬆軟班戟，輕盈微甜，蛋香味濃，的確令人食過返尋味。試過原味嘅話，可以再試朱古力香蕉、芝士慕絲雜莓，甚至係鹹味班戟，同樣有保證。

而入圍名單仲包括另外5間人氣甜品店：日本抹茶甜品店Via Tokyo、京林屋、人龍班戟店PAN de PAIN Pancakes & Sweets、FLIPPER'S同傳統中式糖水佳佳甜品，各位甜魔，揀啱心水就可以投下你嘅神聖一票啦！即刻去優秀開飯熱店大賞網站投票，仲有機會獲得豐富獎品呀。

文：Kar