常問道人生有幾多個十年，OpenRice啱啱就有兩個。踏入開飯二十年，優秀開飯熱店2019以「歷久嚐新」做主題，擁抱經典、傳統老味道之餘，亦緊貼潮流，飽嚐新世代嘅美食。即刻睇下邊啲必試熱店入咗圍啦。

香港人普遍都有個特性，就係貪新鮮，鍾意試新嘢。而上年就有好多間新餐廳開業，當中唔少更加係人氣過江龍，甫開業就已經吸引到好多人去排隊試食。以下入圍「新餐廳」嘅呢10間，你哋試勻未先？

軒仔加持    仙后餐廳

 圖：Food Monster Asia、AdrianWong2011

由軒仔張敬軒主理嘅法式餐廳，傾力重現昔日香港旋轉餐廳情懷，裝修靚到一個點。餐廳提供精緻法國菜，由擺碟到食材都經過心思處理。有現場音樂演繹之餘，仲分分鐘有機會野生捕獲到軒仔，唔怪得餐廳長期都係full booking，要預早訂位先有得食。

高質牛角包  Bakehouse

 圖：Ashley Mok、cheri_t10

唔好睇少呢間主打牛角包嘅烘焙工房，大有來頭呢，係由前四季餅廚Grégoire Michaud創立，大部分工序都係人手製作，品質有一定保證。佢哋嘅牛角包外層相當鬆脆，層次感好豐富，夾啱新鮮出爐即食就更加升多幾lvl！

靚湯手工餃     餃掂手工餃子雲吞專門店

 圖：MasashiIrie、sakichiba

近年香港開咗唔少餃子專門店，要突圍而出當然要有返兩道板斧。呢間除咗以手工製餃子而廣受歡迎之外，更重要嘅係佢哋用嚟配餃子嘅自家煲製狀元九鼎粉葛湯。材料豐富，包括粉葛、鯪魚、鰂魚等，冇落味精但都好夠味。而皮薄嘅餃子又有松茸餡等坊間少見味道，係幾吸引嘅。

滿瀉抵食丼     爆丼丼

 圖：tungtungsika、AbbyHui

滿滿嘅刺身丼飯一向都深得香港人嘅歡心，可以一次過食到好多款魚生嘛。荃灣呢間小店，刺身款式又多又新鮮之餘，仲要抵食，百零蚊就食到四款，包括有海膽同拖羅蓉嘅丼飯，CP值咁高梗係成為大眾寵兒啦。

紐約漢堡店    Shake Shack

 圖：foodiediary、KathKeung

呢間嚟自紐約街頭嘅人氣漢堡店，真係超勁人氣。嚟咁耐，排足咁耐。佢哋嘅牛肉係100%全天然安格斯牛，用原塊牛排度切出嚟嘅牛肉製成漢堡扒，肉味香濃得嚟又夠晒juicy。另外佢哋嘅炸芝士大啡菇漢堡同樣給力，趁熱食仲會流漿拉到絲！

另外5間入圍嘅新餐廳仲包括過江龍黑糖珍奶店老虎堂黑糖專売、嚟自日本嘅幸福班戟、台灣特色小店哈豆、牛扒專門店Steak Bar同埋「無煙韓燒」Lab 10。揀啱就快啲去投票啦，投票有機會獲得豐富獎品，
即投心水餐廳：https://www.openrice.com/info/awards2019/index.html

文：Kar