仲有幾個星期就到農曆新年啦，大家準備好辦年貨未？新年開舖嘅食店又唔多，親朋好友上到嚟屋企梗喺煎翻底年糕一齊食啦。年糕年高，生活水準一年比一年高吖嘛，仲唔快啲睇下有咩特色年糕賀新年？
小丸子陪你過年 奇華餅家
櫻桃小丸子成家都熱熱鬧鬧咁，係咪想好似佢哋咁過年呢？今年奇華就再次同小丸子聯乘，推出限定賀年禮盒，有小丸子迷你亞麻糖年糕同花輪迷你椰汁糖年糕。年糕同包裝上面都有可愛嘅小丸子同花輪同學（唔通已經認可咗佢哋係一對？），真係睇得食得又儲得！
台風星級年糕 茶米
KiKi茶、KiKi麵你就食得多，唔知KiKi糕又點呢？ 為咗迎接農曆新年，茶米就同咗米芝蓮三星大廚區國強師傅合作，創作星級年糕——台灣櫻花蝦年糕，用咗日本蘿蔔、台灣天然日曬櫻花蝦乾同本地臘腸炮製，仲可以配埋KiKi出嘅麻辣醬做佐料，非常惹味。
矜貴之選 帝京酒店
作為五星酒店嘅帝京，過往出品嘅年糕都係質素嘅保證。除咗保持質素，佢哋今年亦力求創新，推出全新口味——松茸蠔豉蓮藕糕。香濃菇菌、甘香蠔豉， 仲加入藜麥、蓮藕等健康食材增加口感，味道豐富！
少見甜糕口味 樂雅軒
城景國際嘅樂雅軒中菜廳，過往推出嘅年糕口味創新得嚟又好食，就好似招牌十勝紅豆糕咁。 不過新嘅一年梗係搞搞新意思， 所以今年特別推出金菠蘿十勝紅豆糕。特別選用清新嘅泰國金菠蘿，配搭香甜日本紅豆， 而且顏色又好睇！
傳統與潮流揉合 海景軒
高級粵菜館海景軒今年以傳統年糕口味作基礎，再加上心思創意配搭配合潮流。就好似紫薯臘味芋頭，將傳統升級，加入大熱人氣嘅紫薯！得意啲嘅仲有奶皇珍珠年糕，都係近年嘅潮流口味。另外比較少見嘅有杭胎菊榛子年糕，啱晒鍾意養生之選嘅人。
手工精緻首創口味 麥籽
相信《美女廚房》嘅觀眾一定對阿Kit（麥潔兒）有印象，而佢嘅心血品牌——麥籽今次帶嚟咗唔少創新口味嘅年糕，而且仲係全人手製作嘅心機之選。 特別推介鵝肝腸金沙芋頭糕。香滑芋頭配上甘香鵝肝腸，再加上金沙鹹蛋黃，咁多材料，食完一定大滿足！大家可以去麥籽嘅網站訂購，大部分嘅一田超市同D2 place嘅Kool Kitchen都可以攞貨！
星級粵菜出品 營致會館
新晉米芝蓮星級粵菜餐廳「營致會館」亦推出賀年糕點，無論係禮盒包裝定係味道配搭都係走精緻高貴路線！而今次嘅椰香錫蘭年糕更加係坊間少見嘅味道。傳統椰汁年糕加上香醇嘅錫蘭紅茶，呢啲細緻嘅口味配搭，夠晒特別！
刁鑽材料合意頭 明閣
買年糕都係講意頭最重要，而明閣總廚推出嘅富貴金桔馬蹄糕，特別加入金桔。無論係個名——寓意大吉大利，抑或個樣金金黃黃都係意頭之選。仲有黑糖遠年普洱年糕 ，加入矜貴嘅雲南陳年普洱茶同黑糖，兩者同樣香醇，非常夾。
中國藝術小清新 Chromahk
唔想下下淨係食年糕咁悶？本地創意藝術蛋糕Chroma就有多個選擇畀你。店舖同國畫家heismilelism合作，將充滿賀年意景嘅國畫融入蛋糕入面，好似「如魚．有餘」蛋糕，有酒釀桂花白朱古力mousse、杞子桂花啫喱同桂花杏仁蛋糕，有創意得嚟又不失傳統。
清新奶黃味 粵
城市酒店花園中菜廳嘅「粵」今年亦都將新元素嘅口味注入係傳統嘅年糕入面。呢個柚子奶黃年糕，個色澤望落去已經好金黃，同隔離啲金幣一樣金光閃閃。而且加咗清新嘅柚子入去，令到奶黃嘅甜唔會太過膩！
文：Yanny
