位於東涌世茂喜來登酒店19樓嘅【海岸扒房】坐擁極致開揚景觀，透過落地玻璃可以俯瞰維港美景，仲可以欣賞機場飛機升降，黃昏時仲有浪漫夕陽相伴。

餐廳設有半開放式廚房，配備專業炭烤爐，食客可以清楚見到廚師烹飪嘅過程。餐廳內嘅玻璃櫃，將乾式熟成牛肉及頂級肉類盡顯食客眼前。

海岸扒房最近推出精選晚市套餐，包括前菜、主菜、甜品，每款都精心製作，講求細膩味道同食材新鮮度。無論你鍾意濃厚肉香定鮮甜海鮮，呢度一定有一款啱你口味！

燒西班牙八爪魚沙律有炭燒香氣嘅同時，保留咗爽嫩口感。八爪魚經過炭燒處理，外層微微焦香，內裏保持彈牙嫩滑，入口帶獨特煙燻香氣，配搭柔軟嘅水晶麵包。沙律中加入清新醬汁，令八爪魚風味更突出，酸甜度適中，非常開胃。

牛扒迷必試300克美國安格斯西冷，肉味濃郁，油脂分佈均勻，炭燒香氣滲入肉質，每啖都啖啖肉汁！可以選擇不同醬汁，各具特色，包括青胡椒汁、阿根廷青醬、龍蒿荷蘭汁、藍芝士汁，為牛扒增添層次感，滿足牛扒控嘅味蕾。

雜菌燴意大利飯綿密掛汁，意大利飯經過燴製程序，充分吸收牛肝菌嘅香氣，味道濃郁又不失層次。配料有舞茸菇、雜菌，每啖都充滿野菌香味，非常適合愛菌類料理嘅食客！

呢個套餐有4款甜品可以揀，當中朱古力黑麥啤酒慕絲蛋糕有著濃厚朱古力香氣，入口細滑，黑麥啤酒嘅微苦味提升朱古力香濃度，仲有海鹽焦糖醬襯托，配埋朱古力雪糕，簡直係朱古力迷嘅天堂！

【海岸扒房】不但有優質牛扒同精選海鮮，仲有開揚景觀加持，絕對值得一試！