講起德國菜，你第一時間會諗起咩？大多數人可能只會聯想到啤酒、鹹豬手、香腸 ，但【Heimat By Peter Find】完全顛覆呢個印象！「Heimat」喺德文解作「家鄉」，餐廳裝潢以時尚溫馨風格為主，令食客可以享受寧靜舒適嘅用餐環境。呢間餐廳由德籍名廚Peter Find主理，將經典德國料理重新演繹，以Fine Dining形式呈現，帶嚟獨一無二嘅「家鄉味」。

客人唔太多嗰陣，主廚Peter Find會親自上菜並解釋菜式概念，令整個用餐體驗更添溫度。希靈魚配紅菜頭沙律呢道前菜絕對唔可以錯過！希靈魚處理得非常細膩，入口甘香，完全無腥味，加上紅菜頭沙律嘅酸甜感，配搭起嚟恰到好處。藍龍蝦配粟米冷盤亦相當不錯，藍龍蝦搭配清甜嘅粟米蓉同粟米脆脆，打造出多重口感！蔬菜餐湯口感順滑，完全冇草青味。

如果你鍾意刀削麵，一定要試試德國版刀削麵 Spätzle，呢款麵水份、蛋含量比一般意粉更高，蛋香味濃郁，口感更加滑順，餐廳以煎香方式處理，搭配香濃忌廉蘑菇汁，一啖落肚超滿足！

大家成日都食德國鹹豬手，但Heimat將傳統德國肉類料理進一步昇華。脆皮烤豬腩肉經過醃製、煙燻、烤焗三重工序，豬皮脆口爽彈！

呢度嘅黑森林蛋糕朱古力味超濃郁，入口細滑而唔會過甜，值得一試！香蕉蛋糕則以大量新鮮香蕉作為基底，減少使用人工糖，蛋糕濕潤而帶天然果香，令人忍唔住一啖接一啖！

除咗提供豐富嘅德國葡萄酒佳釀，亦設有特色果汁配搭。餐後亦會奉上小熊軟糖，充滿德國風情，為整個體驗畫上完美句號。

德國料理同樣可以細膩、層次分明、充滿驚喜。【Heimat By Peter Find】嘅每一道菜都展現出精準火候與高超技藝，突顯食材原味之美。快啲嚟試吓啦！