年年聖誕都係搵靚裝靚景/浪漫西餐廳食大餐？不如今年搞搞新意，試下平時好少食到嘅地中海菜，過一個別有風味嘅聖誕節！大家對地中海菜嘅印象係咪多數都係如鷹咀豆、堅果同香料之類？原來可以有好多變化架，即睇電台主持歪歪到訪上環一間中東菜餐廳實試，分享佢嘅新體驗啦。

煙燻鴨肉拼辣味香菜醬再配地中海乳酪

土耳其文叫basturma，係一種肉類嘅製法，通常用於豬肉或牛肉嘅，意指廚師會加入唔同香料去醃製同煮熟。而今次師傅就選擇咗鴨肉，其中更特別加咗一種叫葫蘆巴嘅香料，係地中海地區常用嘅香料之一。

「佢唔會太鹹嘅，因為仲有少少辣椒作為調味，就令到成件事嗰個味道係都幾豐富嘅嗰個層次，有甜有辣有鹹有酸。」少食中東菜嘅歪歪認為「中東菜嘅特色就係味道好複雜，但係佢哋係互相輝映，而唔係一個冚晒其他。」佢更特別對地中海乳酪點名表示讚賞：「我想特別講下呢個：地中海鮮乳酪。喺唔同嘅中東菜式都會見到用鮮乳酪做嘅醬汁，呢種醬汁我覺得係非常特別，因為你好少可以齋食嗰個醬汁，通常你都要用啲肉嚟點一點咁先好食，你唔會齋食個汁嘛。但呢個我覺得可以……佢嘅質地我覺得係介乎法式新鮮奶油同埋cream cheese中間，個口感係好順滑。由於呢個醬做得咁出色嘅關係，我會形容佢唔係要嚟點呢個燻鴨胸，佢直頭同呢個鴨胸並駕齊驅，同樣都係必須要認真試！」

舞茸菇配黑蒜奶酪醬

餐廳盡快滿足唔同客人嘅需要，所有套餐都有素食選擇。而Festive Chef’s Menu中就可以揀呢個舞茸菇配黑蒜奶酪醬，以舞茸菇為主角，再以炒蔥、炸蒜、石榴等作伴碟，全碟顏色豐富，都幾吸引眼球。

「你一咬落去食到炸蒜嘅脆，然後又遇上舞茸菇嘅腍同埋溫柔，成個口感豐富到。」雖然呢道係素菜，但味道絕非停留喺大眾對素菜多數清淡嘅認知層面。「非常濃郁，呢個菇本身嘅味已經濃，我覺得成個味道嘅濃郁程度，係比得上食一碟肉類嘅菜式。但呢一碟菜其實係全素，我冇諗過食落去個味道係咁濃郁，好似食肉咁。」

烤黑松露三黃雞

至於烤黑松露三黃雞，則伴以杏脯肉同開心果，另外當然唔少得地中海乳酪啦。

「呢個烤三黃雞非常鮮嫩，烤出嚟除咗外皮香口之餘，裡面仲keep咗雞嘅肉汁同嫩滑。我覺得個雞係做得相當之好。至於黑松露味我就唔係好試到，不過因為之前去黑松露餐廳，聽師傅都講過黑松露靚嗰啲就唔使話好濃味，同埋佢咁多配料，所以就輕巧啲嘅黑松露味都可以接受。」而甜甜酸酸嘅乳酪醬更有微微解膩嘅作用。

橙花提拉米蘇

聖誕大餐點可以冇甜品？但冇諗到中東嘅聖誕大餐，甜品居然會係Tiramisu？平時嘅Tiramisu多數會加入Marsala酒、Rum酒或白蘭地製作，呢度選用咗橙酒。

「聖誕嘅風味更濃。呢個Tiramisu好順滑，朱古力味好香。都係嗰句 佢係偏甜嘅，但因為食聖誕大餐我OK。」
Festive Chef’s Menu另外仲包有香草南瓜湯配蒜味地中海乳酪、烤火雞卷配小紅莓乳酪醬同炸洋蔥蒜味香料飯、同開心果釀紅棗等選擇。

 餐廳主廚Richard (左) 與 歪歪 (右)

Bedu  
地址: 中環歌賦街40號地舖

主持：歪歪

文：Kar
相+片：YanYan