美食博覽2019今個星期四就係啦，上次同大家睇完有咩一蚊荀嘢，今次就帶大家睇睇今年會有咩攤位必行必食啦！
 

松露主題

鮮松露手工Gelato（$45/杯）

意大利松露品牌Boscovivo同本地手工雪糕店Igloo合作，推出鮮松露手工Gelato！用上新鮮意大利夏季黑松露，同春季白松露醬製作，雙重享受。
 

（左）鮮黑松露迷你Pizza（$50/份），（右）鮮松露手工啤酒（$50/支）

用上意大利松露品牌 Boscovivo 松露芝士做薄餅餡料，焗完後即刨上新鮮空運到港既意大利夏季黑松露，成個薄餅都係滿滿黑松露片，啖啖都係黑松露味啊喂！而鮮松露手工啤酒除咗支裝，去到會場仲會有生啤賣！一邊飲松露啤酒一邊食松露小食，夠晒嘆。

攤檔：Great (HK) Investment Company Limited（3B-A20）
 

鮮刨松露雪糕（$30/杯）

無獨有偶呢度亦有松露雪糕，松露控見到應該超興奮，因為會喺雪糕球上面即刨大量新鮮黑松露碎！Creamy雪糕加上一粒粒黑松露碎，多重口感同味道享受。

攤檔：Dolce Dolce Kitchen & Gourmet（3B-C08）
 

極濃松露薯片四重奏（$20/份）

松露控必試小食仲有呢款！以意大利樂其雅牌黑松露味薯片，配搭黑松露牛肝菌忌廉醬、經典黑松露醬，同黑松露粉，無論係聞起嚟或者食落口都係非常濃郁嘅黑松露香味！

攤檔：義生洋行（3B-C14）
 

（左）凍松露楓糖意式咖啡（$45/杯），（右） 熱松露蜜糖意式咖啡（$40/杯）

呢個意大利松露品牌今年同咖啡品牌Segafredo Zanetti聯乘，推出松露味咖啡！咖啡本身帶少少黑朱古力香，同松露獨特嘅香氣非常夾。上面會再灑上松露粉，離遠都聞到松露味。
 

（左至右）松露焦糖爆谷、黑松露提拉米蘇、黑松露薄餅（$40/份）

有得飲仲有得食，焦糖爆谷會現場用白松露橄欖油同松露牛油爆香，最後撒上松露粉；提拉米蘇加入松露粉同松露蜂蜜，表現多重層次；薄餅就有松露醬同松露切片，同手工意大利Pizza非常夾。

攤檔：Sabatino Hong Kong Limited （1A-E28）
 

其他必食必買

香港插畫家X日本清酒（純米吟醸$368，純米大吟醸$468）

有酒商搵嚟香港六位插畫師：大泥、Cuson（咳神）、OIC 親子丼、Pal Wong、文地貓同謝曬皮，以香港特色景點為題繪畫酒樽貼紙同紙盒！好似尖沙咀大笨鐘、石板街、天星碼頭等。而清酒亦特別搵有過百年歷史嘅日本佐賀縣酒蔵幸姬株式會社酒廠釀製，有精米步合50%嘅純米吟醸，同精米步合38%嘅純米大吟醸。

攤檔：丹山洋酒（1C-B31）
 

荷蘭貴族手工蛋糕（會場價$137）

呢個台灣蛋糕品牌第一次出現喺香港美食博覽呀，主打招牌荷蘭貴族手工蛋糕，用純鮮奶提煉嘅頂級奶油，同傳承自荷蘭嘅12層烘焙技術，焗出金黃香甜嘅蛋糕，口感扎實，切薄片配紅茶或者咖啡最啱！會場仲會有達克瓦茲騎士（Dacquoise）（會場價$57/8件，$114/16件），同綜合鳳梨酥（會場價$190/12件）。預告一下，佢哋之後會去旺角朗豪坊開Pop-up𠻹呀。

攤檔：阿默企業有限公司（1B-B29）
 

（左）香腸炒米腸（$38），（右）程班長牛肉麵（會場價$45）

香腸炒米腸係美食博覽限定美食，去餐廳就只有大腸包小腸，要親身去會場先食到呢款用台灣香腸同米腸切成片再炒香嘅小食，配以台灣泡菜、台中辣椒膏、醬油膏等，惹味得嚟又唔膩。荔枝角店嘅招牌程班長牛肉麵亦有得食，最啱買完嘢去醫肚！

攤檔：廚家班程班長飲食集團股份有限公司（1A-C12）
 

抺茶手工啤酒（$50/枝，現場試飲價$20/95mL，$40/250mL）

坊間見到嘅抺茶啤酒多數都係先放抺茶粉再加上啤酒沖製而成，呢度嘅抺茶啤就由芬蘭果汁品牌同本地手工啤酒品牌聯手合作，日本宇治抹茶再加上芬蘭蘋果汁，味道微甜無苦澀味，夏天飲就最啱！

攤檔：Great (HK) Investment Company Limited（3B-A20）
 

龍角散草本啤酒（$50/枝，買滿$100可以優惠價$30換購）

呢枝龍角散啤酒當初喺日本出嗰陣可謂相當有話題性，今次美食博覽都有得買啦！龍角散草本啤酒特別加入秋田縣種植嘅龍角散草本粉末，啤酒帶有獨特清涼味道，加上淡淡麥芽同果香。唔講唔知，呢枝酒仲榮獲日本啤酒獎2019銀獎添！

攤檔：盛邦泰德株式會社（1D-B23）
 

（左）威士忌芝士（$250/塊），（右）橙色莊園芝士（$100/塊）

鍾意食芝士嘅朋友可以留意，今年兩款主打各有特色，威士忌芝士用香濃牛奶結合Bowmore’s單一威士忌，再喺24星期嘅熟成當中，每嘅一至兩日用威士忌擦一次芝士，所以每一啖都有麥芽威士忌醇香。而橙色莊園就加入胡蘿蔔素，最啱畀唔鐘意食胡蘿蔔嘅小朋友呀。

攤檔：The Dutch Cheese and More（3B-A21）
 

日本水果

鍾意食日本水果嘅朋友注意啦，呢間做食品批發嘅公司有唔少選擇，包括而家當造，鮮甜多汁嘅山梨一宮水蜜桃，同山梨春日居岡部之桃水蜜桃！其他水果包括長野/山梨香印青提、北海道紅肉蜜瓜、溫室蜜柑、北海道/長崎刺身白粟米等。

攤檔：Wing Mau Tai Chong Fruits（3B-E11）
 

盒裝冷藏榴槤（會場價$160/盒，$300/2盒）

榴槤鐵粉一定唔可以錯過，呢盒冷藏榴槤喺泰國奪得「The Quality Award 2019」，每一舊都金黃飽滿，榴槤香氣重！榴槤由泰國直運到港，每盒都保證重達450克，而且甜度達38度以上，解完凍就即刻食得，啱晒懶鬼。

攤檔：山下菓子（3B-E03）
 

合味道滋味福袋（$90）

平時鍾意食杯麵嘅朋友可以留意吓，呢個福袋除咗有得試最新、八月先發售嘅大杯極辛豬骨湯味杯麵，仲有一個帆布袋、保溫杯、其他味道杯麵七個以及一包薯片，好抵買！

攤檔：日清食品（1D-D02）
 

福袋（$100）（每日限量100個）

另外呢間嘅福袋都好抵買，裡面有8款產品，總值超過$730！包括法國金樂絲法式傳統薄脆禮盒、法國Chocmod覆盤子脆脆黑朱古力棉花糖、德國Hachez品味系列55夾心牛奶朱古力等零食，同澳洲聖賢母卡邦尼意粉醬同通心粉，一次過幫Office零食櫃同返屋企廚房入貨！

攤檔：歐洲食品有限公司（1B-C10）
 

最後提提大家，今年大會都加強咗環保措施，例如擴大餐具借用服務，博覽期間每日會提供約5,000個可循環再用餐盒、5,000隻不鏽鋼叉同2,000可循環再用水杯。
 

去任何一個「借用站」（展覽館1E入口及3E 南大堂）畀每件$20按金就借得，用完去回收站（展覽館1A、1C及3E大堂）交還就可以拎返按金。當然自己帶餐具就更好啦！唔少攤位亦會響應措施，自攜餐具將會有唔同優惠，例如飲品即減$5、額外95折等。現場亦會增設兩個洗餐具嘅區域（1A-E32、3E-D16）。

第30屆美食博覽
活動日期：2019年8月15至19日
地址：香港島灣仔博覽道1號香港會議展覽中心
購票指南及其他詳情：香港貿發局美食博覽

文：Cathy、Yanica
相、片：Tom、Cathy