美食博覽2019今日正式開鑼！今年同樣有分公眾館同尊貴美食區，上次同大家睇過有咩$1優惠同特色美食，今次繼續先睇睇公眾館有咩必掃小食同必買產品啦！

公眾館

冰雪爆谷(每日12:00及16:00免費送25杯)

夏日炎炎，除咗食雪糕雪條，有無諗過食爆谷都可以消暑。呢度有全港首創嘅冰雪爆谷，口感香脆味道香甜，不過得每日12時及下午4時免費送25杯，想買都無啊！想食記得去排定隊。

攤位: Popcorn brother 1C-E32

松露鹹蛋黃炸雞 $40

炸雞加入鹹蛋黃、牛油及松露炒，松露味都幾出吓，而且鹹蛋味恰到好處，唔會太膩！

攤位: 1D-D27

王將餃子 $20/6隻

大阪名物王將餃子呢度都有得食，餃子即叫即製，熱辣辣皮薄多肉汁。食完鍾意可以買返幾包返屋企自己整。

攤位: 大阪王將 1C-A02

柳丁炸醬鴨胸沙律 $25

成個沙律精華所在就係個柳丁炸醬，香得嚟帶少少柳丁酸味，係開胃之選。另外都有罐裝柳丁炸醬($70)買，夏天無咩胃口嗰陣食撈吓嘢就最啱。

攤位: 星華發展1B-C11

抹茶芝士玉子燒/米紙脆pizza　$40

加入抹茶醬嘅玉子燒較甜，味道比想像中夾，另外加入大量芝士，拉絲效果好澎湃！呢個米紙脆pizza都罕見，平時食開多數都係蒸嘅米紙卷，呢度就拎去煎，外皮煎到卜卜脆，餡料加入肉鬆、札肉、沙律醬及泰式辣醬，夠晒惹味。

攤位: 玉子燒1B-B28 

好滋味佛跳牆 $60

想食好西可以嚟食佛跳牆，一次可以食勻花膠、鮑魚及冬菇等名貴美食，仲炆得好入味吓～

攤位: 德興隆海味1A-C08

麻辣青瓜蛋白+麻辣皮蛋 $25 / 土匪雞翼粉 $40

加入自家製麻辣醬，又香又辣。較特別可以試試佢地個蛋白粒粒，蛋味都幾突出。平時鍾意土匪雞翼一定要買佢哋個土匪雞翼粉，輕輕醃一醃，自己喺屋企都食到啦！

攤位: 翠宏紅油1A-E23 

牛骨濃汁牛丸/豬骨濃汁貢丸 $25

牛丸100%全澳洲牛肉，以牛腿肉製造，牛骨湯汁味濃，彈牙爽口。貢丸亦以純鮮豬肉製成，一樣咁多汁彈牙。

攤位: 振興牛丸1A-D7&D9

蔬菜味煎魚餅/串串魚糕 $15(買二送一)

有留意開韓國美食嘅朋友應該對呢間魚糕專門店唔陌生，無論煎魚餅定上湯串串魚糕呢度都有得食，魚糕口感彈牙，一於嚟感受吓韓國風味！

攤位: 古來思魚糕1A-D12-14

布丁燒 $30

集齊雞蛋布丁、焦糖及輕乳酪芝士蛋糕，一個布丁食勻三個味道同三種口感。

攤位: Sweet Grace 1C-A31

貓山王榴槤套餐 $150

講到美食展就點少得榴槤，榴槤套餐包括一款貓山王榴槤蓉、D24榴槤蓉及D24榴槤糯米糍，貓山王將原隻鮮果打成蓉，味道濃郁；D24相對就會Creamy啲。

攤位: 一方食品 1C-B22、24

島根県香印提子酒 $100/枝 $150/2枝

香印提子咁好食，又點可以唔試吓香印提子酒呢？呢枝酒一入口先感受到香濃果味，香印提子味仲要係今次美食博覽獨家，出面買唔到㗎！另外仲有桃同菠蘿味揀。

攤位: 新大和1B-C16 

荔枝蜜桃味牛奶 $8/包

韓國著名品牌Binggrae最新口味荔枝蜜桃味牛奶，荔枝味比蜜桃味重，味道清甜，唔使飛韓國都飲到啦～

攤位: KING’s HK limited 1B-D31 

大記手工糕點月餅 $168/1盒(六個不同口味)

有別於傳統月餅，呢度嘅月餅質感其實就比較似糕點，味道包括紫薯忌廉、紅豆栗子及椰汁奶皇；亦有水果口味如菠蘿、西柚及百香果。

攤位: 大記食品1B-B27 

無味精紫菜 $28/1包 $100/5包

用韓國最頂級海苔製成，不含人造添加劑、味精及防腐劑。海苔厚身香脆，味道有五款，包括原味、芝士、椰子(首次登陸香港)、穀物及鯷魚，煲劇食就最啱。

攤位: 集隆市貿易1B-A16 

英式燒腩仔皮 $20/1包  $100/6包

燒腩仔皮超香脆，黃色包裝落咗豬油，味道特別香。除咗當零食，平時食湯麵是落幾塊落去食都好正～邪惡都要食啊！

攤位: MR. PORKY 1A-E34 

鴨脖 $29/1盒

想買啲佐酒小食，呢度嘅鴨脖、鴨舌就最啱！而家仲做緊全場買三送一優惠，好抵買！

攤位: 絕味1B-A13

黑糖珍珠北海道牛奶雪糕 $40

今年新出口味，將珍珠奶茶變成軟雪糕，最特別係加上黑糖珍珠，增加口感層次。

攤位: 阿波羅 1E-A10

大白兔奶糖雪糕 $40/份

用咗大家嘅童年回憶：大白兔奶糖嚟製作雪糕，一份有兩球再加煉奶同大白兔糖。食落無想象中咁重牛奶糖味，叫做過下口癮都唔錯。

攤位: Sunny Day Kitchen 3E-A14

文: Cathy、Yanica

相: Cathy、Tom