喺OpenRice 搵食，除咗睇吓大家嘅食評同相片外，其實都可以喺「進階搜尋」嗰度揀「咪嘥嘢食店」嚟揀餐廳，入面全部都係參加咗「咪嘥嘢食店」計劃嘅食店嚟，代表佢哋都願意主動減少廚餘同剩食，同時幫手宣傳環保意識。作為食客嘅我哋，揀咪嘥嘢食店食飯絕對係最方便嘅惜食行動，食飯都可以間接幫地球減廚餘、垃圾同塑膠。

 喺OpenRice Apps 進入「進階搜尋」，喺「食品/餐廳類型」就可以搵到「咪嘥嘢食店」喇。

今次我就去咗兩間「咪嘥嘢食店」睇吓有咩惜食行動，順便睇吓有咩好嘢食～其中一間就係油麻地城景國際入面嘅樂雅軒中菜廳，酒店嘅環保措施比預期做得更全面，連餐廳嘅環保主任Karen同其他員工嘅卡片都用上環保紙印刷並寫上「Think Green, Stay Green」。 

樂雅軒門口有綠色植物點綴。

城景國際大堂用膠樽種滿淨化空氣嘅植物，Karen笑言，呢啲植物膠樽盆係由佢哋一班員工親手回收膠樽再造，喺實行環保初期製成。及後環保措施越嚟越成熟廣泛，餐廳陸續實行少飯半餸、廚餘回收、控制食材、洗碗機電力回收等。

 酒店大堂嘅植物膠樽盆，由一班同事回收膠樽自製而成。

樂雅軒作為「咪嘥嘢食店」，少飯半餸當然有。除咗炒飯同炒麵外，小菜都可以選擇半餸，連點心都可以揀半份。點菜時，員工亦會主動提醒食客可揀少飯半餸減少浪費。

至於廚房多咗嘅剩食又點處理呢？如果貪方便倒咗去都係變相增加廚餘，所以餐廳選擇每日將剩食捐畀慈善機構，分畀有需要嘅人士。幫到社會之餘，同時幫到地球。

 餐廳放有提示牌，呼籲食客切勿浪費，宣傳惜食文化，侍應亦會提醒佢哋有少飯或半份選擇。

樂雅軒喺廚房嘅多個角落都會放有廚餘收集桶，方便員工將廚餘分類回收。餐廳每年會安排員工培訓，灌輸惜食文化、減少廚餘嘅概念，同時亦教導分辨可回收嘅廚餘，例如太大件嘅廚餘，好似豬骨咁，就唔適合回收，要回收嘅話就要將骨件切細喇。

 廚房放有多個廚餘收集桶，方便員工回收廚餘。

廚房貼上可回收廚餘分類表，令每位員工對廚餘分類更了解，非常細心。

有啲廚餘就可以簡單循環再用㗎，咖啡渣就係其中之一喇。樂雅軒會將剩低嘅咖啡渣烘乾，畀員工自行拎返屋企放入雪櫃、鞋櫃吸味，或者當做肥料種植物都得。

 將咖啡渣烘乾就可以循環再用，而且用途好廣泛。

疫情之下，食客亦特別注重餐具清潔。唔講唔知洗碗機嘅耗電量都幾高，樂雅軒就特別採用有環保認證嘅洗碗機，可以將洗碗機嘅熱吸收再用，最高可以慳到48%嘅電力㗎。

 餐廳特別引入獲環保認證嘅洗碗機，將熱吸收再用，節約電力高達48%。

此外，餐廳亦提供低碳套餐，共有4款菜式—香醋雲耳拼拍蒜青瓜、金湯南瓜瑤柱羹、雲耳糟溜鱈魚片、鮮蝦什菌燴千層，仲有健營金粟紅糙米炒飯或粟米銀耳粥同埋精美糖水。9成食材都來自本地供應商，並選用青瓜、南瓜、糙米、鮮蝦等低碳水化合物食材，低碳足跡之餘亦低醣低碳。

(上)金湯南瓜瑤柱羹、(左)鮮蝦什菌燴千層、(右)雲耳糟溜鱈魚片
低碳套餐選用低碳水化合物食材。

金湯南瓜瑤柱羹好足料。

健營金粟紅糙米炒飯。

另一間「咪嘥嘢食店」，就去到深水埗明愛醫院入面嘅悠閑閣餐廳，店內多個地方都貼上提示少飯嘅咪嘥嘢海報，提醒大家依食量揀少飯、少餸甚至走飯。咦？原來少飯之餘，仲可以走埋飯？店家笑言唔少女仔揀「兩餸飯」時都會走飯，份量啱啱好唔會浪費。食唔晒嘅話，店家亦歡迎自備外賣盒帶走剩餘食物，以減少廚餘。

 店內環境非常寬敞舒適。

悠閑閣相當重視廚餘處理，店內嘅「餐盤回收站」設有廚餘收集桶，等食客自行收拾餐盤時，能夠將可回收廚餘同一般垃圾分開，提升廚餘回收效率外，亦培養食客同員工回收廚餘嘅習慣。

 畀食客飯後放餐盤嘅「餐盤回收站」，設廚餘收集桶同一般垃圾桶，方便廚餘分類。

店家特別聘請環保公司，回收廚餘至小蠔灣嘅有機資源回收中心處理。其實悠閑閣開業至今未夠一年，店家坦言初開業時每月有約40公斤廚餘，及後努力分析每日銷售量以調整食材數量，儘量減少用剩嘅食材，以減低因腐爛而產生嘅廚餘，直至而家已成功每月減少約10公斤廚餘。

 店家聘請環保公司，將廚餘運往小蠔灣嘅有機資源回收中心處理。

此外，大廚喺處理食材時亦儘量用盡，唔會貪方便隨意切走過多蔬菜瓜果嘅「菜頭菜尾」，並且每日徹底清洗廚房，正確控制貯存食物嘅環境、時間同溫度，以避免腐壞浪費。

店家坦言指，疫情之下好多人都買外賣，所以食客自備食物盒可免外賣費，鼓勵食客自備外賣盒。同時店家亦希望透過唔同嘅走塑措施，例如用紙袋代替膠袋、只提供紙飲管、唔會主動提供即棄餐具等等，以減低香港堆填區嘅壓力。

 自備食物盒可免外賣費。員工唔會主動提供外賣餐具，希望以自助形式擺放餐具、調味料等供食客按需要取用，減少浪費。

想親身支持「咪嘥嘢食店」，悠閑閣係其中一個好選擇。因為佢哋提供嘅食物款式有好多，輕西餐、中式麵飯、日本料理、素食或三文治都有，今次一行幾人就試咗口水雞、野菜橄欖油天使麵、銀芽三絲炒麵同照燒鰻魚飯，每款菜式都做得唔錯，價錢唔貴值得支持。

 口水雞辣度適中，醬汁以芝麻、辣椒、辣油煮香，好啱撈飯。

全素嘅野菜橄欖油天使麵，味道清新。

照燒鰻魚飯嘅鰻魚好厚切，汁係自家調製，微鹹好開胃。

其實有唔少人都覺得環保係餐廳慳錢嘅藉口，今次接觸過「咪嘥嘢食店」後，發覺實行環保反而有額外成本，但佢哋為咗保護環境都願意付出多少少。如果平時揀餐廳食飯，不妨去多啲「咪嘥嘢食店」，支持吓咁有心嘅餐廳，亦都為惜食香港出一分力。