「食飯咪嘥嘢呀！」並唔係口號，當你知道食物對好多人黎講係奢侈品，你又點捨得浪費呢? 平時喺OpenRice 搵食，我哋可以經進階搜尋揀選「咪嘥嘢食店」，依啲食店願意主動減少剩食、廚餘同實踐環保。作為食客，我哋可以配合依啲餐廳食飯唔嘥嘢源頭減廚餘，一齊「惜飲惜食」，為地球出一分力喇。
打開OpenRice 進入「進階搜尋」，喺「食品/餐廳類型」就可以搵到「咪嘥嘢食店」喇。
【賞味軒】幫基層開飯 減少剩食．善用食材
香港大學嘅食店「賞味軒」就同學生合作，以成本價提供飯盒，再免費派發賣剩嘅飯盒畀有需要人士。業務經理Elaine 提到：「我哋會預先傾好派發數量，確保飯盒唔會過剩浪費。我好欣賞學生們嘅熱誠，希望呢個舉動可以幫到更多人。」其實如果我哋屋企有過剩食材、罐頭，都可以自發捐畀有關機構，咪嘥嘢之餘亦令更多人得到溫飽。
香港大學外賣店「賞味軒」。
每日必有素食 低碳足跡
「賞味軒」主打外賣，每日提供約4款午餐選擇，其中一道必定係素食。除咗可以令學生食得健康之外，素食生產過程中所需嘅能量都比肉食低，所以素食可以做到低碳足跡、低醣，環保又健康。
素食選擇，日式雜錦海藻芝麻醬撈烏冬。
下午茶時段平售午餐 減少剩食
雖然菜式設計可以低碳環保，但賣唔晒始終都會浪費。Elaine 透露自有辦法：「如果午餐賣唔晒，下午茶時段我哋會調整份量再以相宜價錢出售，減少剩食。而且我哋開業多年，有豐富經驗，因應每月學生嘅流量調整入貨量，所以每日都剩餘極少食材㗎。」
善用食材 賣幾多、煮幾多
除咗控制食材入貨量，原來善用食材都係一大學問。Elaine提到：「如果當日餐單有雞髀、雞翼，剩左落黎嘅雞肉會整成鹽酥雞，盡量減少浪費。好多學生都好鍾意我哋嘅鹽酥雞㗎，因為我哋即叫即炸。食落特別脆口惹味。不過最緊要都係善用食材，確保賣幾多、煮幾多，唔會嘥咗。」
台式椒鹽鹽酥雞。
三椒沙茶牛肉飯。大廚具40年經驗，設計多款惹味香口菜式吸引學生。
溫馨提示 少飯咪做大嘥鬼
店內嘅餐牌同收銀處都有貼上「珍惜食物，如有需要減少份量」嘅溫馨提示，只要大家記住每啖飯都相當珍貴，就自然會按自己食量嗌適當份量，食晒啲飯餸唔做大嘥鬼。
店內貼上「咪嘥嘢食店」惜食海報。
自助外賣區 減少即棄廢物
自律除咗可以減少廚餘，同樣可以減少即棄塑膠廢物㗎！「賞味軒」歡迎食客自備餐具同食物器皿。餐廳唔會主動提供外賣餐具或者調味料，而係擺放喺自助區，等食客有需要時先自行取用。咁做可以大大減低即棄塑膠廢物，尤其係膠餐具同埋調味料包裝。除此之外，餐廳依家已經以紙飲管代替膠飲管，希望可以全方位齊齊走塑。
特設自助外賣餐具、調味料區，食客有需要先自行取用，減少浪費。
【一念素食】望對環境友善 食客親身體驗惜食環保
同樣位於香港大學嘅「一念素食」就唔單只係素食，更係全素無五辛、無麩質。餐廳創辦人Thomas 嘅理念好簡單，就係想對環境友善一啲，而依份簡單嘅環保理念就充分貫徹左喺佢嘅裝潢設計同埋食材處理上面。
「一念素食」自助素食，全素無五辛、無麩質。
實現學生心願 環保物料融入裝潢
只要你細心留意，就會發現呢度小至掛燈、枱凳；大至牆壁、地板都係環保物料。Thomas提到：「設計初期，我同設計師有共識地採用大量環保物料。呢度好多掛燈都係回收50、60年代碗碟，枱凳亦係向學校回收再加工設計。」Thomas 指住天花一盞大掛燈續道：「呢盞燈係一班學生用回收膠樽製作而成，好開心我哋畀到機會一班學生完成心願。另外店內嘅牆壁同地板用咗竹、仲有FSC認證嘅木材，咁做可以減少濫伐森林，促進森林生態可持續發展。」
(左)掛燈來自回收50、60年代碗碟。
(右)向學校回收枱凳再加工設計。
(左)藍白色吊燈儼如雲朵，係一班學生想完成嘅環保心願。
(右)羽毛球座枱燈亦係學生作品，為羽毛球重新賦予生命。
每日兩次採購食材 減少食材浪費
由於蔬菜係即日入貨，對減少食材浪費都有一大好處。「一念素食」每日朝早淨係購入午市所需用量，下晝兩點幾再依據剩貨量採購。所以每日剩餘嘅原材料極少，就算用淨左要儲存到聽日先再用，都會按先入先出原則、正確控制存放溫度、離地至少5cm 避免腐爛同防治蟲鼠。確保物盡其用，唔會浪費。
水果存於適當溫度，若即將過期會作湯底、甜品，減少浪費。
自助素食形式 教育咪嘥嘢過程
Thomas 坦言，自助形式亦係一個教育咪嘥嘢過程：「我哋接近休市時間就會停止上菜，減少剩食。但好多食客見到餐盤剩返少少就嫌棄唔想要。其實平時出街食飯，你都有機會食到最後一份餐點，但點解你又會覺得無問題？其實食物本身真係無問題，千祈唔好因為觀感而浪費食物，呢個係好好嘅教育機會。」
食客按自己食量舀餸，依重量付款食幾多、拎幾多。
店內寫上標語，提醒食客珍惜食物。
外賣提供可重用餐盤，鼓勵食客飯後洗淨交還。
支持「醜食文化」 蔬果生得唔靚都食得
的確，好多食材因為「生得唔靚」被嫌棄，結果出現一堆賣唔出等爛嘅蔬菜瓜果。外國早有「醜食文化」，解構蔬果稍有瑕疵並不影響營養、味道、健康。Thomas 亦身體力行同本地農夫合作，出售「有機醜蘿蔔」製作嘅蘿蔔糕。
蘿蔔糕插畫包裝，可二次使用作揮春或明信片留念。
餐廳同時向本地農場引入賣剩蔬果，製作「粒粒冬瓜露」沖調飲品及「蘿蔔和風甘酢漬」入饌煮餸，由食材源頭開始減少掉棄，盡用食材。
「粒粒冬瓜露」及「蘿蔔和風甘酢漬」。
鼓勵回收廚餘 發電．綠化生生不息
廚餘處理係餐廳同食客都需要著重嘅課題，所以「一念素食」設有廚餘收集桶，鼓勵食客自行收拾餐盤時，將可以回收嘅廚餘同垃圾分開。
餐廳員工會運往香港大學廚餘收集站，最後廚餘會送到小蠔灣有機資源回收中心，利用厭氧分解技術將廚餘轉化為生物氣發電，過程中產生嘅殘餘物又可以用嚟堆肥，用於園林綠化同農業生產上，將廚餘循環再用，生生不息。
(左)設廚餘收集桶，鼓勵食客分開可回收廚餘、垃圾。
(右)香港大學廚餘收集站。
家中種植 重用咖啡茶葉渣
廚餘處理睇落好似遙不可及，但其實簡單至咖啡渣都做到。「一念素食」部分香料會擺放喺香港大學種植，員工不時將咖啡渣、茶葉渣烘乾整成肥料，親身示範其實有機種植都可以好簡單，喺屋企種可以食幾多、摘幾多，減碳環保之餘又減少浪費。餐廳表示歡迎食客自攜器皿拎咖啡渣循環再用，甚至放入雪櫃、鞋櫃吸味都得㗎。
有機種植香料好簡單，食幾多、摘幾多，減碳環保。
聘請聽障人士主理手沖咖啡。推薦香草果仁中烘焙，果仁味香，甘而不苦。
「一念素食」提供私房菜，以養生食材入饌。
(左)姬松茸五指毛桃椰子腰果湯。
(右)松露石榴球。以意大利果醋、黑醋等調味，酸甜開胃。
手工餃子。分別以菇菌、沙葛做出兩種口感。