【特約分享】社企合力耕耘‧共享美味同行美食博覽搜羅中秋節食品

美食博覽又嚟喇，喺掃各式零食美食時，消費得精明之餘都可以消費得有意義。今年喺1樓1E展覽廳A18號會舉行「社企美食嘉年華」，多間社企售賣各式好味又有特色嘅食品，包括以下介紹3間社企推出嘅月餅禮盒，讓大家慶祝佳節時倍添意義。

「社企美食嘉年華」展位

細味公平推有機咖啡月餅、咖啡優惠套裝

「細味公平」係公平棧轄下嘅香港公平貿易品牌，推出嘅產品都以公平貿易、本地生產、好味無添加為原則，藉此保護大自然同減輕貧窮，同時畀大家多一個良心消費嘅選擇。細味公平嘅生產團隊招聘唔少本地婦女做員工，員工都好認同品牌背後推動嘅理念，工餘時間更會將品牌文化帶入生活。好似曾經係幼稚園老師嘅少梅，喺細味公平工作7年後，不時買品牌嘅果乾畀孫女，一嚟支持公平貿易，二嚟佢知道產品成分健康，令一家人食得安心。

今年細味公平第2年參展，除咗帶嚟有機月餅、有機果仁、咖啡豆同咖啡用品外，仲有咖啡渣環保產品、現場更提供拼配及即磨咖啡豆服務、預購月餅，以及品牌副線、百分百香港製造嘅「攜喜街」食品。

細味公平嘅月餅由一班本地婦女員工人手製作

手工月餅由街坊婦女親手製作，2款月餅共4款口味：
招牌「鳯凰月」（預訂按此）- 用鬆化曲奇皮，包住鹹香蛋黃及用人手炒製2小時嘅新鮮鳳梨餡料。
「三重滋味」月餅（預訂按此）- 內有3款口味（各2個），有伊予柑橘豆沙月、摩卡咖啡蓮蓉月同經典低糖蓮蓉月。其中摩卡咖啡蓮蓉月嘅曲奇餅皮，加入新鮮烘焙嘅印尼卡瑤咖啡，味道獨特，啱哂咖啡迷。

手沖咖啡套裝（會場限定: $588｜原價：$684）：磨豆機+環保不銹鋼濾杯+200克精品咖啡豆

細味公平一向賣唔少咖啡產品，全部都係香港本地烘焙、有機認証嘅精品級別單品咖啡豆，會場更設有限定咖啡優惠套裝。

咖啡渣可以製作環保產品，例如呢款栽土盆栽，入面放咗羅勒嘅種籽，細心灌溉大約1星期就會發芽。

品牌副線「攜喜街」嘅食品除咗標榜香港製造，亦著重健康，部分產品更可以現場購買。好似同「香港雞蛋仔」聯乘推出嘅精品咖啡口味急凍雞蛋仔，就用有機Arabica精品咖啡粉製作，仲不含防腐劑架。如果之後想再次購買，可以到官網選購（按此）。

會場限定：細味公平設有遊戲，贏取獲得DRIVER雙軸承手搖伸縮磨豆機一部！

綠家居多款綠色食品．新出低糖健康月餅

仁愛堂喺2007年成立嘅社會企業綠家居，主力宣揚「綠色生活，環保選購」嘅理念，所以產品都係對環境友善嘅綠色食品同家居用品，為大家提供健康、多元化、價廉物美嘅綠色消費選擇；綠家居仲提供「㇐站式」訂製特色禮品包、家居同辦公室環保清潔等服務，部分收益用於支持仁愛堂各項福利服務。好似疫情期間，仁愛堂向弱勢社群同長者會員送上防疫物資同節日福袋，減輕佢哋嘅經濟負擔。

今個中秋節，仁愛堂首度同皇玥集團合作，攜手推出特別版「皇玥‧仁愛堂低糖雙色月餅」，舉辦中秋月餅慈善義賣活動，綠家居更全力支持，率先喺美食博覽即場開賣呢款慈善月餅。部分曾受惠於仁愛堂嘅中心長者會員，更到場幫手義賣，身體力行支持社企。

今年推出嘅「皇玥‧仁愛堂低糖雙色月餅」，禮盒以深粉紅色為主色，充滿節日氣氛，而用簡潔線條繪畫嘅圓形，除咗象徵團圓，亦表示仁愛堂藉著社區服務服務社會大眾。
月餅禮盒1盒有低糖芝麻同低糖烏龍2款口味，前者味道香濃，後者清新；而且採用麥芽糖醇代替白糖，大幅減低糖分喺5%以內，加上皇玥獨特嘅烘焙手法，令月餅口感軟滑，喺健康同滋味之間取得平衡。

嘆月餅時配搭社企出售嘅蕎麥茶、黑豆茶等健康飲品或有機茶包解膩，咁就唔怕食多幾件啦。

匡智社會企業部弱勢社群自家製月餅+曲奇

自1999年起，匡智社會企業部透過開辦唔同類型、自負盈虧嘅社會企業項目，為輕度智障同自閉學員提供多元化嘅工作機會，讓佢哋有機會喺真實工作環境中接受在職培訓，探索自己嘅發展方向、建立自我價值同提升競爭力。2009年成立嘅hc:Bakery品牌，推出由學員參與製作嘅烘焙產品，收益全數重投營運之用，以達至可持續發展，又促進社會共融。

hc:Bakery學員主要來自特殊學校、技術訓練中心，喺實習期間，可以鍛煉手眼協調、提升工作效率同培養積極面對困難嘅心態。日常練習製作皇牌產品「匡智曲奇」時，亦會畀學員自由創作花紋，發揮創意。今次現場售賣嘅產品，主打hc:Bakery嘅手工迷你月餅同曲奇，每款都由餅房廚師、專業導師同學員一齊用心製作，學員亦會在現場參與銷售，獲取更多工作經驗，更可同顧客交流。

Set A：香滑奶皇、清新伯爵茶｜Set B：傳統蓮蓉、香濃芝士（各2件）