【特約分享】熱血青年搞Cafe　自設農地無添加

一直都話，做人最緊要有夢想。辛辛苦苦考完試終於畢業，滿腔熱血，做份普通文員真係甘心咩？其實好多人唔係無夢想，而係現實社會嘅機會太少。博愛醫院就為年青人開設咗「博愛Cafe」，為天水圍區內想成為咖啡師嘅年青人提供工作機會，仲畀咗好大空間佢哋創作飲品、曲奇同鳥結糖等。最最最特別嘅係，佢哋仲自設農地種香草，用各種新鮮香草入饌同沖製香草茶。

環境舒適，呢度不時仲有烹飪班、表演活動等。

自家種植嘅香草類別好多。

社工同年青人　一齊成長

「博愛Cafe」聘請咗幾位年青人做咖啡師，雖然頭銜係咖啡師，而其實Cafe所有嘢都係佢哋一手包辦。駐場幾位社工會同佢哋一齊營運Cafe，創作新菜式、宣傳等都會一一參與。

駐場社工之一Iris（右二）同年青人一齊營運Cafe、創作新產品。

健康無添加曲奇

「博愛Cafe」堅持要食得健康，所以全部食品都係人手親製，無添加劑、防腐劑等。最新創作就係艾草曲奇，入口先有牛油香同微甜，後續就有新鮮艾草回甘，味道幾特別，仲可以養生𠻹！

(左) 朱古力曲奇、(中) 艾草曲奇、(右) 雲石曲奇。

軟糯鳥結糖

鳥結糖係「博愛Cafe」嘅熱門食品之一，同樣係一班員工親手製作，零添加劑。出售時佢哋會細心地包上糯米紙，令鳥結糖保持軟糯，味道亦唔會過甜，買番屋企後要趁新鮮食呀。

鳥結糖有原味、朱古力、抹茶同伯爵茶口味。

自設農場　親手種香草入饌

坊間好難買到新鮮香草嚟沖茶，「博愛Cafe」就有自己嘅農地種香草，可以將新鮮香草烘乾做成香草茶包，味道清新又健康。

一包香草茶包只係$5，可以沖到3至5杯茶㗎。

編輯就試咗甜菊香草，味道竟然好似糖咁甜。因為係全天然、零糖份，連糖尿病患者都可以飲㗎。同場仲有約10款香草，親身嚟試吓自己鍾意咩味啦。

除咗香草茶，佢哋都有將香草入饌意粉、曲奇等。

2019美食博覽有得買

呢啲咁美味嘅小食同茶包，可以喺嚟緊灣仔香港會議展覽中心舉行嘅美食博覽社企攤位(1E展覽廳A18號)買到喇！到時仲有其他唔同嘅社企擺檔，喺首兩日(即8月15至16日)喺社企攤位買夠一定金額嘅貨品，仲有精美紀念品送𠻹！(紀念品數量有限，送完即止) 「博愛Cafe」會喺8月17至19日擺檔，快啲嚟美食博覽社企攤檔支持吓啦！