酒店餐廳較少可以帶同寵物入座，而九龍灣呢間西式餐廳係其中一間。酒店原為本地老字號水壺品牌嘅舊廠房，所以餐廳以品牌英文名「Camel」為題，設計色彩繽紛嘅打卡牆同展覽，讓你享受高質餐點，同時輕鬆體會本地文化，以及幫愛寵影靚相！

餐點推介

鍾意食香口菜式嘅朋友，推介你試秘製烤乳豬～師傅控制烤乳豬嘅時間同溫度啱啱好，外皮卜卜脆，肉質保持嫩滑。另外配以彩虹薯仔同秘製醬汁，惹味又飽肚。

唔少人都鍾意食法式油封鴨腿，鴨腿先用多種香料醃至入味，再低溫慢煮、油封，口感軟嫩有肉汁，微焦嘅外皮則增加口感層次；伴上茄子、彩虹薯仔等時蔬減輕油膩感，獨食都唔會滯。

香煎盲曹柳則適合鍾意魚鮮或輕盈料理嘅朋友，優質盲曹柳相當厚肉，只需少少鹽、香草就可以輕易帶出食材本身嘅鮮味，加上魚皮煎得香脆，每啖都有外脆內軟嘅效果。

無澱粉質不歡？君立秘製無骨海南雞配白飯幫到你～呢道菜糅合傳統海南風味，將肥瘦適中嘅本地三黃雞醃製後以慢火烹調，再用冰水浸泡，皮爽肉滑；配埋湯品同3款醬料，味道層次豐富。

用餐過後不妨參觀埋店內嘅品牌展覽，重溫充滿那些年回憶嘅品牌歷史~

Café 15  
地址：九龍灣宏光道15號君立酒店地舖

*資料由客戶提供