喺疫情繼續不穩嘅時勢，好多朋友仔都會揀留喺屋企食，又或者lunch都買外賣返office食。有見及此，開飯仔將會不斷為大家搜羅全城至抵嘅外賣自取餐廳，等大家安全抗疫之餘，亦可慳慳錢。今次就集齊指定食品有半價嘅日本菜餐廳，揀啱更可即時撳掣用手機落單！
大阪牛肉飯（附凍麥茶） CHI Tachinomi (屯門) 
圖：arkai221
呢間日式居酒屋有多款串燒同飯類選擇，其中大阪牛肉飯就有半價優惠！燉煮過嘅牛肉口感軟滑，淋埋醬汁都幾惹味。
日式餃子+日式溏揚炸雞 金鶴拉麵 (佐敦、土瓜灣、天后、中環)
圖：以雞白湯而聞名嘅拉麵店，食拉麵之餘可以叫多2款小食，冇咁齋嘛。日式餃子同日式溏揚炸雞都做緊外賣自取半價，前者煎得幾脆，內餡包有豚肉同椰菜，有肉汁添；後者炸得幾脆，內裡肉質都仲係嫩滑。
香蔥吞拿魚蓉丼+燒豚肉溫泉玉子丼 惠比壽本店 (葵涌)
圖：呢間日本店一向都以平民價供應多款日本料理，而家半價嘅唔止有兩款丼飯，重有日式茶碗蒸、炸餃子、日式炸雞槌、鹽燒三文魚骨、面豉湯等小食，好抵呢。平得嚟仲要足料，吞拿魚蓉厚墩墩，燒豚肉亦大大塊。
照燒汁銀鱈魚+煙薰黑豚肉+美國安格斯薄燒牛肉+黑豚肉薄燒 灜鐵板燒 (尖沙咀)
圖：鐵板燒都有得外賣，重要半價，真係唔好錯過。幾款半價食品包括銀鱈魚、黑豚肉等，煙薰過嘅黑豚肉，唔止多咗陣smoky嘅香味，肉質更加滑身咗。
壽司+手卷+火焰鵝肝壽司+咖喱壽司+卷物+刺身 禮三井日本料理 (油麻地)
圖：呢間舖頭好多壽司都有做半價，比較特別嘅就有火焰鵝肝壽司同咖喱壽司。對於必須要食好多飯或碳水化合物嘅朋友仔嚟講，半價壽司係幾吸引呢，平得嚟又飽肚。
文：Kar
